नगरपालिकाद्धारा चारहजार परिवारलाई राहत वितरण

२४ चैत, काठमाडौं । भक्तपुर र काठमाडौँ जिल्लासँग जोडिएको कागेश्वरी मनोहरा नगरपालिकाले नगरभित्रका चार हजार ९०० परिवारलाई राहत वितरण गरेको छ । विश्वव्यापीरुपमा पैmलिएको कोरोना भाइरसका कारण सरकारले लकडाउन घोषणा गरेसँगै छाक टार्न समस्या भएका अतिविपन्न, असाहय र मजदूरवर्गका उपभोक्तालाई नगरपालिकाले राहत वितरण गरेको हो ।

नगरपालिकाले आइताबार साँझसम्मको तथ्याङ्कअनुसार नौवटै वडाका चार हजार ९०० परिवारलाई राहत वितरण गरिएको जनाएको छ । विपद् तथा प्रकोप व्यवस्थापन कोषबाट गरिएको राहत वितरणबाट नगरभित्रका छाक टार्न मुस्किल पर्ने विपन्न परिवार लाभान्वित भएको नगरपालिकाका प्रमुख कृष्णहरि थापाले बताएका छन् ।

दैनिक ज्यालादारी गरेर छाक टार्ने र विपन्न परिवारलाई चामल, दाल, खाने तेल र साबुन खरिदका लागि विपन्न परिवार छनौट गरी प्रतिपरिवार एक हजारको दरले नजिकैको खाद्यान्न पसलबाट आवश्यक सामान खरिद गर्ने गरी कुपन बाँडिएको नगरप्रमुख थापाले बताएका छन् । विपद् कोषमा नगरपालिकाको ५० लाख र अन्य अनुदान तथा सहयोग सङ्कलन स्वरुप ४० लाख गरी जम्मा रु ९० लाख सङ्कलन भैसकेको छ । अवस्था हेरेर राहत वितरण गर्दै जादाँ नपुगेको खण्डमा नगरपालिकाले थप रु ५० लाख कोषमा जम्मा गर्ने पनि प्रमुख थापाले जानकारी दिएका छन् ।

यसैबीच नगरपालिकाको वडा नं ६ स्थित अर्याल गाँउ नमूना टोल सुधार समितिका टोलबासी र सिन्धुपाल्चोक जिल्ला पत्रकार महासङ्घका अध्यक्ष महेश श्रेष्ठको सक्रियताबाट सङ्कलन भएको रु हजार २१५ वडा नं ६ का अध्यक्ष प्रकाश फुयाँललाई हस्तान्तरण गरेका छन् । कोरोना रोकथाम तथा विपन्न परिवारलाई राहत प्याकेज वितरणमा सहयोग पुगोस् भन्ने हेतुले आर्थिक सङ्कलन गरी हस्तान्तरण गरिएको स्थानीयवासी राजेन्द्र दुलालले बताएका छन् ।

त्यस्तै वडा नं। ६ का वडा अध्यक्ष प्रकाश फुयाँलले उक्त सहयोगले ठूलो राहत मिलेको बताएका छन् । विपद् कोषमा जम्मा भएको बजेट कम भएका कारण सबै विपन्न परिवारलाई समेट्न नसकेको खण्डमा टोलबासीले गरेको आर्थिक सहयोगबाट थप विपन्न परिवारलाई राहत बाँड्न सहयोग पुगेको उनले बताएका छन्।  हालसम्म नगरपालिकाले कोरोनाको रोकथाम तथा उपचारको लागि गागलफेदी तथा विभिन्न स्वास्थ्य चौकीमा गरी ६० क्वारेन्टाइन तथा ५ आइसोलेसन कक्ष तयार गरेको छ । साथै, नगरपालिकाले उपचारको लागि आवश्यक परेको खण्डमा तत्काल उद्दार गर्न चारवटा एम्बुलेन्स तयारी अवस्थामा राखेको छ ।

नगरप्रमुख थापाका अनुसार, “नगरभित्र विदेशबाट आएका जम्मा ५६ जना रहेको र उनीहरुमा कोरोनासंग मिल्ने कुनैपनि लक्षण हालसम्म फेला परको छैन । कोही कसैमा यस्तो लक्षण देखेमा तत्काल खबर गर्न प्रत्येक वडालाई जानकारी गराएका छौं ।”