मजदुरको सहारा बन्दै स्थानीय सरकार, तीव्र बन्दै खाद्यान्न वितरण

२६ चैत, लमजुङ । विश्वमा तीव्ररूपमा फैलिरहेको कोरोना भाइरस सङ्क्रमणका कारण सरकारले लागु गरेको लकडाउनले काम ठप्प हुँदा खानलाई समस्यामा परेको मजदुरको सहारा स्थानीय सरकार बनेको छ । जिल्लामा रहेका आठ वटै स्थानीय सरकारले आआफ्नो पालिकाभित्र रहेका मजदुरहरुलाई खाद्यान्न वितरण प्रक्रिया तीव्र बनाएका छन् ।

प्रमुख जिल्ला अधिकारी लक्ष्मणबहादुर खड्काका अनुसार मङ्गलबारसम्म जिल्लाका चार नगरपाकिला र चार गाउँपालिकाका छ हजार ४२३ मजदुर परिवारलाई खाद्यान्न वितरण गरिसकिएको छ । यी परिवारका लागि एक लाख १० हजार ९१३ केजी चामल, आठ हजार ३०४ केजी दाल, पाँच हजार ३१९ लिटर तेल, पाँच हजार ४४४ नुन प्याकेट र पाँच हजार ५९० गोटा साबुन वितरण भइसकेको प्रजिअ खड्काको भनाइ छ ।

यी जिल्लाका सबै स्थानीय तहको ७५ वटै वडामा कुल आठ हजार १४२ जना श्रमिक रहेको उहाँले बताएका छन् । गण्डकी प्रदेश सरकारले हरेक नगरपालिकालाई रु १० लाख र गाउँपालिकालाई रु पाँच लाखका दरले बजेट विनियोजन गरेको छ ।