आमा छोरालाई कोरोना पोजेटिभ, बुहारीलाई नेगेटिभ

३ बैशाख, काठमाडौं । पेप्सिकोलामा रहेको सनसिटी अपार्टमेन्टमा बस्दै आएका एउटै परिवारका तीनमध्ये दुई जनालाई कोरोना संक्रमण पुष्टि भएपनि अर्कोलाई भने संक्रमण नभएको पाइएको छ ।

सनसिटीमा बस्दै आएका एउटै परिवारका आमा, छोरा र बुहारीलाई र्यापिड टेस्ट गर्दा पोजेटिभ रिर्पोट आएपछि सोमबार पाटन अस्पताल भर्ना गरिएको थियो । लगत्तै राष्ट्रिय जनस्वास्थ्य प्रयोगशालामा गरिएको परीक्षणमा आमा र छोरालाई संक्रमण पुष्टि भएपनि बुहारीलाई भने संक्रमण नभएको रिर्पोट आएको छ ।

बुधबार आएको रिर्पोटमा बुहारीलाई संक्रमण नदेखिएको स्वास्थ्य तथा जनसंख्या मन्त्रालयका प्रवक्ता विकास देवकोटाले जानकारी दिए । यसअघि मंगलबारको रिर्पोटमा ८१ वर्षीया आमा र ५८ वर्षका छोरालाई कोरोना संक्रमण पुष्टि भएको थियो ।

उनीहरुको पाटन अस्पतालमा उपचार भइरहेको छ । बेलायतबाट एक महिना अघि आएका उनीहरुलाई कोरोना संक्रमण पुष्टि भएपछि सनसिटी अपार्टमेन्टमा बस्दै आएका सबैको कोरोना परीक्षण थालिएको छ ।

बुधबार दिउँसोसम्म २ सय ९६ जनाको परीक्षण गर्दा सबैको रिर्पोट नेगेटिभ आएको छ । अपार्टमेन्टका पाँच वटै ब्लकमा परीक्षण गरिने मन्त्रालयले जनाएको छ ।