र्यापिड टेष्टस रिपोर्ट नेगेटिभ देखिए पछि क्वारेन्टाइनमा बसेका ११० जना घर फर्किए

४ वैशाख, गुल्मी । जिल्लाका विभिन्न स्थानीय तहमा क्वारेन्टाइनमा रहेका ११० जना घर फर्किएका छन् । कोरोना भाइरसको संक्रमण फैलन नदिन जिल्ला बाहिर र भारतबाट घर फर्केका उनीहरुलाई कोरोनाको कुनै लक्षण नदेखिएको हुँदा सातदेखि १४ दिनसम्म सम्बन्धित स्थानीय तहमा क्वारेटाइनमा राखेर घर पठाइएको स्वास्थ्य कार्यालय गुल्मीका प्रमुख डा भवानीप्रसाद शर्माले बताएका छन् ।

जिल्लाका छ पालिका क्वारेन्टाइनमा अझै ३२ व्यक्ति बसिरहेका छन् । स्वास्थ्य कार्यालय गुल्मीले जिल्लाका मदाने, धुर्कोट, गुल्मीदरबार र रुरुक्षेत्रका क्वारेन्टाइनमा रहेका २५ जनाको ¥यापिड टेष्टसमेत गर्दा रिपोर्ट नेगेटिभ आएको स्वास्थ्य कार्यालय गुल्मीका प्रमुख डा शर्माले जानकारी दिएका छन् । मंगलबार रुरुक्षेत्र गाउँपालिकावाट थप एक जनाको स्वाब परीक्षणका लागि बुटवल पठाइएको स्वास्थ्य कार्यालयले जनाएको छ ।