डाक्टर कुट्ने डीएसपी लम्साललाई जिम्मेवारीबाट हटाइयो, थप अनुसन्धान हुँदै

४ वैशाख काठमाडौं । नेपाल प्रहरीले महानगरीय प्रहरी वृत्त, महाराजगञ्जका डीएसपी उमेशराज लम्साललाई विभागीय कारबाही गर्नुका साथै जिम्मेवारीबाट हटाएको छ । लकडाउन कडाई गर्ने नाममा डाक्टरहरुमाथि नै कुटपिट गरेको घटना सार्वजनिक भएपछि डीएसपी लम्साललाई साे जिम्मेवारीबाट हटाइएको हो ।

डीएसपी लम्साललाई महानगरीय प्रहरी आयुक्तको कार्यालय, रानीपोखरी सरुवा गरिएको छ । रानीपोखरीका डीआईजी विश्वराज पोखरेलले लम्साललाई छानबिनका लागि रानीपोखरी बोलाइएको पुष्टि गरे ।

बुधबार साँझ शिक्षण अस्पतालमा कार्यरत तीन जना डाक्टरमाथि प्रहरीले लाठी बर्साएको थियो । ड्युटी सकेर खाना खाएपछि उनीहरु आफ्नो कोठा जान खोज्दा प्रहरीले लकडाउन उल्लंघन गरेको भन्दै कुटपिट गरेपछि घटना सार्वजनिक भएको थियो ।

सोही घटनाको छानबिन गर्न एसएसपी किरण बज्राचार्यको नेतृत्वमा एसपी मुकेश सिंह र डीएसपी होविन्द्र बोगटी सदस्य रहेको समिति पनि गठन गरिएको छ । तर नैतिकता र जिम्मेवारीका हिसाबले लम्साललाई भने प्रहरीले तत्कालै विभागीय कारबाही प्रक्रिया अगाडि बढाएको छ ।