बैशाख १६ पछि लकडाउन खुकुलो बनाउने तयारी

८ बैशाख, काठमाडौं । लकडाउनले अर्थतन्त्रमा गम्भिर प्रभाव पर्ने भन्दै निजी क्षेत्रबाट परिमार्जन गर्न चर्काे दवाव पर्न थालेपछि यस सम्बन्धमा सरकार केही लचिलो बन्ने संकेत मिलेको छ ।

वैशाख १५ गतेसम्मका लागि जारी गरिएको लकडाउनको स्वरुप परिवर्तन गर्न सरकारले गृहकार्य अगाडि बढाएको स्रोतले बताएको छ । यसका लागि कोरोनाको जोखिमलाई तीन वर्गमा विभाजन गरी स्वरुप निर्धारण गर्न स्वास्थ्य मन्त्रालयले गृहकार्य थालेको बताइन्छ ।

स्रोतका अनुसार कोरोना संक्रमणको जोखिम बढी रहेको हटस्पटमा भने लकडाउन अझै कडा गर्ने नीति सरकारले लिएको छ । तर कम जोखिम रहेका स्थानमा भने जनजीवन १६ गतेदेखि अलि सहज बनाउने तयारी गरिएको छ । राजधानीलगायत कम जोखिम भएको भनिएका स्थानमा निजी सवारी साधन, उद्योग तथा कलकारखाना र कृषि कार्य गर्न १५ बैशाखपछि खुकुलो बनाइन लागेको जानकारी स्रोतले दिएको छ ।

निजी सवारी साधनहरु मध्ये कारमा बढीमा चार जनासम्म चढाउन मिल्ने तर मोटरसाइकलमा भने एकजना मात्र सवार हुन पाइने नियम लागू हुने संभावना रहेको स्रोतको दावी छ । चैत्र ११ गतेदेखि मुलुकमा लकडाउन जारी छ ।