अध्यादेश फिर्ता गर्न कांग्रेसको माग, दोषको भागीदार देउवा पनि

९ बैशाख, काठमाडौं । सरकारले हिजो जारी गराएको दुई अध्यादेशलाई प्रमुख प्रतिपक्षी दल नेपाली कांग्रेसले गलत समयमा गलत निर्णय भनेको छ । पार्टी पदाधिकारीको आज बिहान बसेको बैठकले राजनीतिक दल विभाजन सम्बन्धी ऐन र संवैधानिक परिषद सम्बन्धी ऐनमा गरेको परिमार्जन निरंकुशतातर्फको संकेतका रुपमा लिएको छ ।

सभापति शेरबहादुर देउवा निवास बुढानिलकण्ठमा भएको सो बैठकले संविधानको मर्म विपरित ल्याइएका अध्यादेश गैर प्रजातान्त्रिक रहेको ठहर गरेको छ । साथै जारी गरिएका अध्यादेश तत्काल खारेज गर्न समेत माग गरिएको छ । यस प्रकरणमा भोलि बुधवार सरकार बाहिर रहेका अन्य दलहरुसँग थप छलफल गर्ने निर्णय गरेको प्रवक्ता विश्वप्रकाश शर्माले जानकारी दिएका छन् । लोकतन्त्रको मूल्य मान्यता विपरित आएको अध्यादेशको सबै प्रजातन्त्रप्रेमीलाई विरोध जनाउनसमेत आग्रह गरिएको उनले बताए ।

कोरोना भाइरस संक्रमणको त्रासमा अहिले देशैभर लकडाउन भएकाले सामाजिक सञ्जालमार्फत विरोध गरिने पनि प्रवक्ता शर्माले बताए । सरकारले निर्णय फिर्ता नलिए कानूनी उपचारमा जाने तयारी समेत रहेको उनले बताए । यसबारे सम्बद्ध पक्षसँग हामी छलफल गर्ने छौं– प्रवक्ता शर्माले भने । नेपाली जनता कोरोना संत्रासमा फसेका बेला प्रधानमन्त्री ओली भने सत्ताको खेलमा अल्झिएको भन्दै उनले गतल प्रवृत्ति र निर्णयको जोडदार विरोध गरिने बताए । यस्ता सन्देश हामी सामाजिक सञ्जालमार्फत संप्रेषण गर्ने छौं – शर्माले भने ।

आजै उनले ट्वीटर हेण्डलमार्फत प्रधानमन्त्री ओलीलाई मेन्सन गर्दै लेखेका छन्– लकडाउनले कहाँ छेक्छ र ? हेर्नाेस् हजारौं कालो झण्डा सामाजिक सञ्जालमा । बैठकमा सभापति देउवाका साथै वरिष्ठ नेता रामचन्द्र पौडेल, उपसभापतिद्वय विमलेन्द्र निधि र विजयकुमार गच्छदार, महामन्त्रीद्वय डा. शशांक कोइराला र पूर्णबहादुर खड्का, पूर्व महामन्त्रीद्वय प्रकाशमान सिंह र कृष्णप्रसाद सिटौलालगायतको उपस्थिति थियो ।

यसैबीच, बलियो प्रतिपक्षी नभएकाले नै ओलीले यस्ता गलत निर्णय गर्न थालेको टिप्पणी समेत हुन थालेको छ । राजनीतिक विश्लेषक पुरञ्जन आचार्य भन्छन्– संविधानको मर्म र भावना विपरित यस्तो गलत अध्यादेश जारी गर्ने आँट कांग्रेसको लुतेपनले प्राप्त भएको हो । प्रधानमन्त्री ओलीले यस्तो निर्णय लिनुमा नेपाली कांग्रेसको नेतृत्वसमेत कारक रहेको उनले बताए ।

विगतमा सरकारका कमी कमजोरीबारे सशक्त विरोध नगर्दा नै ओली हौसिएकाले यस्तो निर्णय लिन नडराएको उनको बुझाई छ । वैकल्पिक सरकारको रुपमा रहनुपर्ने प्रमुख प्रतिपक्षी दलका नेता नै सत्तामा भागबण्डा खोज्न उद्यत् भएपछि तानाशाहले गर्ने नै यस्तै हो – राजनीतिक विश्लेषक आचार्यले भने । अहिले पार्टीले जे जस्तो निर्णय लिएपनि त्यसको कारकमा देउवा पनि सहभागी छन् भन्दै उनले अब प्रायश्चित गर्नुपर्ने बताए ।