स्वाब परीक्षणमा ३९ को रिपोर्ट नेगेटिभ, एक मात्र बाँकी

धीरुभाइ

१० बैशाख सप्तरी । पछिल्लो पटक सप्तरीमा २१ जनाको स्वाब रिपोर्ट नेगेटिभ आएको छ । यससँगै जिल्लामा ३९ जनाको स्वाब परीक्षणको (पीसीआर विधिबाट) रिपोर्ट नेगेटिभ भएको छ ।

गजेन्द्रनारायण सिंह अस्पताल राजविराजका अनुसार कोरोना संक्रमणको आशंकामा गरिएका स्वाब परीक्षणमा मंगलबारसम्म ३९ जनाको रिपोर्ट नेगेटिभ आएको छ । पछिल्लो पटक धरानस्थित बीपी कोइराला स्वास्थ्य विज्ञान प्रतिष्ठान घोपामा पठाइएका २२ जनामध्ये २१ जनाको स्वाब रिपोर्ट मंगलबार प्राप्त भएको अस्पतालका मेडिकल सुपरिटेन्टेन्ट डा. चुमनलाल दासले भने सबैको रिपोर्ट नेगेटिभ आएको छ । एक जनाको रिपोर्ट आउन बाँकी रहेको र आजीसम्म उनको रिपोर्ट प्राप्त हुन सकिने बताए ।

पछिल्लो पटक गत आइतबार २२ जनाको स्वाब परिक्षणका लागि बीपी कोइराला पठाइएको जानकारी दिदै उनले यसअघि १८ जनाको स्वाब परिक्षण पनि नेगेटिभ आएको बताए । अघिल्लो र पछिल्लो गरी ३९ जनाको स्वाब परीक्षणमा कोरोना संक्रमण पुष्टि नभएको बताए ।

जिल्लाको तिलाठी कोइलाडी गाउँपालिका १, खडक नगरपालिका १० र सप्तकोशी नगरपालिका १ का एक÷एक गरी तीनजनाको आरडीटी गर्दा रिपोर्ट पोजिटिभ देखिएको बताउँदै उनले उनीहरु समेत ३९ जनाको स्वाब परीक्षण रिपोर्ट नेगेटिभ आएको जानकारी दिए । भारत दिल्लीस्थित निजामुद्दीनसहित विभिन्न राज्यबाट फर्केर आएका जमाती, कतार, अमेरिका र भारतबाट आएका गरी ४० जनाको स्वाब परीक्षणका लागि धरान पठाइएको थियो ।

गत शुक्रबार उदयपुरको त्रियुगा नगरपालिका ३ भुल्केस्थित मस्जिदमा बसेका १३ जनामा कोरोना संक्रमित पुष्टि भएपछि त्यसअघि उनीहरुले सप्तरीको सप्तकोशी र कञ्चनरुप नगरपालिकाको मस्जिदमा समेत बसोबास गरेको यात्रा बृतान्तमा पाइएपछि उक्त मस्जिद वरिपरि बसोबास गरेका २१२ जनाको आरडीटी परीक्षण गरिएको छ ।

जिल्लामा हालसम्म ४० जनाको स्वाब संकलन गरिएको छ भने ६४ महिला र ४५७ पुरुष गरी ५२१ जनाको आरडीटी परीक्षण गरिएको छ । त्यस्तै स्थानीय सरकारले सञ्चालन गरेको क्वारेन्टाइनमा १३१ जना र होम क्वारेन्टाइनमा २२ जना रहेको स्वास्थ्य कार्यालयका निमित्त प्रमुख दुनियालाल यादवले जानकारी दिए ।