५० परिवार मुक्त हलियालाई राहत वितरण, १३४ अझै क्वारेन्टाइनमा

१२ वैशाख, बैतडी । ५० मुक्त हलिया परिवारलाई बिहीबार राहत वितरण गरिएको छ । लुथरन विश्व फेडरेसनको आर्थिक सहयोगमा जिल्ला हलिया मुक्ति समाज बैतडीले मुक्त हलियाका परिवारलाई खाद्यान्न वितरण गरेको जिल्ला हलिया मुक्ति समाज बैतडीका उपाध्यक्ष जयराम लोहारले बताए ।

राहतमा प्रतिपरिवार ३० किलो चामल, तीन किलो दाल, दुई लिटर खानेतेल, दुई किलो नुन, चार वटा साबुनका दरले वितरण गरिएको हो । उक्त राहत दशरथचन्द नगरपालिकाका ३० परिवार र सुर्नया गाउँपालिकाका २० परिवारलाई वितरण गरिएको हलिया मुक्ति समाज महासङ्घका वरिष्ठ केन्द्रीय सदस्य राजुराम भूलले बताए ।

लकडाउनका बेला राहत पाइकामा मुक्त हलियाहरुले खुसी व्यक्त गरेका छन् । एकल महिलासमेत रहेकी दनपा–४ की लीला भूलले लकडाउनका कारण आफूले मजदुरीसमेत गर्न नपाएकाले भोकै बस्नुपर्ने अवस्था आउँदा राहत पाएकोमा खुसी व्यक्त गरे ।

१३४ अझै क्वारेन्टाइनमा

बैतडीमा १३४ जना अझै क्वारेन्टाइनमै बसिरहेका छन् । भारत तथा देशका विभिन्न भागबाट जिल्ला भित्रिएकाहरुलाई क्वारेन्टाइनमा राख्ने नीतिअनुसार प्रत्येक पालिकामा बनेका क्वारेन्टाइनमा १३४ जना रहेको स्वास्थ्य कार्यालयले जनाएको छ।

कार्यालयले पछिल्लो पटक उपलब्ध गराएको विवरणानुसार दशरथचन्द नगरपालिकामा १७, पाटनमा १९, पुर्चौंडीमा ६८, पञ्चेश्वरमा पाँच, दोगडाकेदारमा चार, डिलाशैनीमा २० र सिगासमा एक जना क्वारेन्टाइनमा बसिरहेका कार्यालयका कोभिड–१९ सम्पर्क व्यक्ति भुवनप्रसाद जोशीले जानकारी दिए। उनले भने, “उनीहरुलाई दुई हप्ता क्वारेन्टाइनमा राखेर र्यापिड टेस्ट गरेर नतिजा नेगेटिभ आए मात्रै घर पठाइनेछ ।” कोरोना भाइरस रोकथाम तथा नियन्त्रण योजनाअन्तर्गत जिल्लामा प्रवेश गरेकाहरुलाई क्वारेन्टाइनमा राख्ने गरिएको हो ।