संकटमा जनताको पक्षमा काम गर्न राप्रपाका नेता लावतीकाे सुझाव

१२ बैशाख काठमाडौं । राष्ट्रिय प्रजातन्त्र पार्टी (राप्रपा) का नेता सगुनसुन्दर लावतीले कोभिड–१९ विरुद्धको लडाईँमा पूर्ण केन्द्रीत रहने, अनावश्यक सत्ता संघर्षमा नलाग्ने भन्दै सत्तारुढ दलका नेतृत्वपंक्तिले सार्वजनिक संकल्प गर्नु पर्ने बताएका छन् ।

‘महाव्याधीको समयमा अनावश्यक सत्ता र शक्ति संघर्ष नगर्ने सत्तारुढ शासकवर्गले देशवासीको नाममा सामूहिक, सार्वजनिक सपथ गर्नु पर्दछ । लावतीले शुक्रबार भने । दु्रत गतिमा अध्यादेश जारी र फिर्ता गर्न सक्ने सरकारले संकटको समयमा पूर्ण गतिमा जनताको पक्षमा काम गर्नु पर्ने उनले बताए ।

‘सीमा, राजधानी, गाउँठाउँ र विदेशमा अलपत्र परेका नागरिक र बन्दाबन्दीमा दुःखमा परेका निमुखा जनताको सेवा र हितमा एक्सप्रेस सेवा सरकारले उपलब्ध गराउनु पर्दछ उनले भने । नेकपा सरकारले राजनीतिक दल र संवैधानिक परिषदसम्बन्धी विधेयक फिर्ता गरे लगत्तै लावतीले ट्वीट गर्दै यस्तो धारणा सार्वजनिक गरेका हन् ।

अध्यादेश जारी गर्ने र फिर्ता गर्ने क्रममा देशको आँखा खुलेको भन्दै उनले भने ‘सरकारले चाहे द्रुत गतिमा काम हुँदो रहेछ, गर्न सक्दो रहेछ । राष्ट्रपतिबाट आफ्नो सरकारको पक्षमा एक्सप्रेस सेवा उपलब्ध हुने रहेछ । भैंसीपाटीमा सत्तारुढ उच्चस्तरीय जमघट हुन संभव रहेछ ।’ कोरोनाविरुद्धको लडाईँमा चरणबद्ध योजना र एक्सन, आर्थिक राहत र योजनाको प्याकेज घोषणा र कार्यान्वयन, लावतीले सरकारसँग माग गरेका छन् ।

हाल सम्मको अनुभव र कमीकमजोरीका आधारमा सरकारले कोभिड–१९ विरुद्ध राष्ट्रिय संरचना क्रियाशील गराउनु पर्ने सुझाव दिएका छन् । अध्यादेश प्रकरणको सक्रियतासमेत ध्यानमा लिएर त्यस्तो राष्ट्रिय संरचना निषेधभन्दा माथि उठेर सक्रिय गराउनु पर्ने नेता लावतीको भनाइ छ ।