राप्रपाको परामर्श बैठक : कोरोना रोक्न सरकारले गरेको कार्यान्वयन पक्ष कमजोर

१५ बैशाख काठमाडौं । राष्ट्रिय प्रजातन्त्र पार्टी ‘राप्रपा’ ले कोरोना भाइरसको महामारी नियन्त्रण गर्न सरकारले चालेका कदमहरु उपयुक्त भएपनि कार्यान्वयन पक्ष अत्यन्त कमजोर रहेको आरोप लगाएको छ ।

राप्रपाका तीन अध्यक्षहरुको उपस्थितिमा आइतबार बसेको परामर्श बैठकले कोरोना रोक्न सरकारले गरेको कामको कार्यान्वयन पक्ष कमजोर रहेको निचोड निकालेको हो । साथै राप्रपाले लकडाउन खुकुलो गर्दै लैजाने वारे उपयुक्त रणनीति बनाउन राप्रपा सरकारको ध्यानआकर्षण गराएको छ ।

राप्रपाले संकटको बेलामा राजनीतिक अस्थिरता ल्याउने गतिबिधि नगर्न आग्रह गर्दै स्वास्थ सामाग्री खरिदमा भ्रष्टाचार भएको तथा समाजवादी पार्टी फुटाउने प्रयासमा स्वयं सरकार र सत्तारुढ दल अनैतिक र अपराधिक गतिविधिमा संलग्न रहेको विषय बाहिर आएकोले सत्यतथ्य पत्ता लगाई दोषी उपर कानुनी कारवाही गर्न माग गरेको छ ।

यस्ता छन्,राप्रपाले गरेका निर्णयहरु:

(१) कोरोना भाइरसको महामारी नियन्त्रण गर्न सरकारले चालेका कदमहरु उपयुक्त भएपनि कार्यान्वयन पक्ष अत्यन्त कमजोर रहेको छ। लकडाउन लम्ब्याउने बाहेक अन्य विषयमा सरकारको उपस्थिति, प्रयास र प्रभावकारीताको अनुभूति हुन सकेको छैन। कोभिड-१९ को प्रकोप नियन्त्रण गर्न सरकारले चालेका कदमहरुमा राप्रपाले सकारात्मक र रचनात्मक सहयोग पुऱ्याउंदै आएको छ। विगतमा राप्रपाले दिएका सुझावहरुतर्फ सरकारले गंभीर ध्यान नदिएको प्रति दु:ख प्रकट गर्दै स्वास्थ्य सामाग्रीहरुको तत्काल आपूर्ति गरि स्थानीय तहसम्म पुर्‍याउने व्यवस्था गर्न, परिक्षणको दायरा र गति व्यापक तुल्याउन तथा ज्यालादारी  एवं न्युन आय भएका विपन्न परिवारलाई दिईने राहत वितरण कार्य व्यवस्थित र पारदर्शी  गर्न,उद्योग बाणिज्य, कृषी, पर्यटन र अन्य व्यवसायिक क्षेत्रलाई दिईने कर सुविधा, ऋण र अनुदानको तत्काल घोषणा गर्न,बिदेशमा रहेका नेपालीहरुको स्वास्थ र रोजगारी सुरक्षाको निमित्त उपयुक्त व्यवस्था  गरी आबश्यक भए देश फर्काउने काम गर्न राप्रपा पुन: सरकारको ध्यान आकृष्ट गर्दछ।

(२) लकडाउनले कोरोना भाइरसको महामारी फैलिन नदिन महत्वपूर्ण भूमिका निर्वाह गरेको तथ्य सर्वविदित छ। संभवत: लकडाउनलाई केही समय निरन्तरता दिईनु पर्ने हुन्छ। तर, लकडाउन नै सबै समस्याको समाधान होईन। त्यसर्थ, विज्ञहरुको राय सल्लाह लिएर प्रभावित क्षेत्रहरुको वर्गिकरण गरि क्रमश: लकडाउन खुकुलो गर्दै लैजाने वारे उपयुक्त रणनीति बनाउन राप्रपा सरकारको ध्यान आकर्षित गर्दछ। पहिलो चरणमा कृषी र ठूला निर्माण आयोजना एवं कम प्रभावित जिल्लाहरुलाई प्रथमिकतामा राख्नु उपयुक्त हुनेछ।

साथै, कोरोनाको प्रकोप अन्त्य नभएसम्म सामान ढुवानीको निमित्त बाहेक  भारत र चिनसंगको  सिमा बन्द गर्न,नियमन गर्न तथा सम्पूर्ण व्यावसायिक अन्तर्राष्ट्रिय उडान बन्द गर्न राप्रपा सरकारको ध्यानाकर्षण गर्दछ।

(३) देश कोभिड-१९ संक्रमण बिरुद्ध एकढिक्का भएर लाग्नु पर्ने घडिमा सत्तारुढ दल नेकपा आन्तरिक सत्ता र शक्ति संघर्षमा अलमलिन पुग्नु दुर्भाग्यपूर्ण छ। संबिधानको भावना विपरित सरकारले हालै जारी गरेको राजनीतिक दल र संबैधानिक परिषद सम्बन्धि अध्यादेश त्यही विकृतिको पछिल्लो उदाहरण हो। चर्को जनदवाव पश्चात उक्त अध्यादेश हाल  फिर्ता भएको छ। संकटको अवस्थामा त्यस्तो गैरजिम्मेवार कार्य दोहरिन नदिन तथा राजनीतिक अस्थिरता, अन्यौल र अराजकता सिर्जना गर्ने कुनैपनि कार्य नगर्न सरकार, सत्तारुढ दल र सम्बद्ध सबै पक्षसंग राप्रपा अपिल गर्दछ।

(४) स्वास्थ सामाग्री खरिदमा भ्रष्टाचार भएको तथा समाजवादी पार्टी फुटाउने प्रयासमा स्वयं सरकार र सत्तारुढ दल अनैतिक र अपराधिक गतिविधिमा संलग्न रहेको सार्वजनिक जानकारीमा आएको छ। यस बिषयमा सत्यतथ्य पत्ता लगाई दोषी उपर कानुनी कारवाही गरियोस् भन्ने राप्रपा सरकार र अन्य सम्बद्ध निकायसंग माग गर्दछ।

(५) लकडाउनको आचार संहिताको पालना गर्दै राप्रपाले क्रमश: आगामि दिनमा पार्टीका गतिविधिहरु संचालन गर्नेछ।