ओलीको संकटमोचनको कथा

समाचार टिप्पणी

२२ बैशाख, काठमाडौं । लगभग राजीनामा गरेर बालकोट बसाई सर्नुपर्ने अवस्थामा पुगिसकेका प्रधानमन्त्री केपी ओलीमाथिको संकट कसरी नाटकीय ढंगले मोचन भयो त ? धेरैलाई आश्चर्य लागेको छ । तीन दिनअघि प्रधानमन्त्री र पार्टी अध्यक्षबाट राजीनामा दिनुपर्छ भनि कुर्लेका अर्का अध्यक्ष पुष्पकमल दाहाल प्रचण्ड १८० डिग्री फन्को मार्ने अवस्थामा कसरी पुगे ? त्यो पनि सरोकारवालाका लागि विचित्रको घटना लागेको छ ।

यसको मूलकारण भनेको सचिवालय बैठक शुरु हुनुअघि ओलीले प्रचण्डसँग गरेको निर्णायक वार्ता नै रह्यो । राष्ट्रपति विद्यादेवी भण्डारीलाई भेटी करिब साढे पाँच बजे फर्किएका ओलीले सचिवालय बैठक कक्षमा कुरिरहेका प्रचण्डसँग एक्लै कुरा गर्न चाहे । करिब २० मिनेट दुई अध्यक्षबीच भएको वार्ता नै सहजीकरणको प्रस्थान विन्दू बन्यो–बालुवाटार निकट स्रोतले भन्यो ।

दुबै अध्यक्षबीच गुप्तगु हुन थालेपछि प्रतीक्षामा रहेका अरु सदस्यलाई निकै खुलदुली बढेको थियो । जब बैठक सुरु भयो ओलीले बढो भावुक भएर विगतमा आफुबाट सरकार र पार्टी सञ्चालनका क्रममा कमी कमजोरी भएकोमा आत्मालोचना गरे । लगत्तै बोलेका प्रचण्डले पनि प्रधानमन्त्री ओली अब संस्थागत रुपमा अगाडि बढ्न तयार भएको र विगतको कमजोरीप्रति आत्मालोचना गरेकाले नयाँ ढंगले जानु उपयुक्त हुने धारणा राखे ।

पराजयको चरणमा रहेका ओलीका लागि बामदेवको साथ नै वरदान सावित भएको उनले बताए । शनिबार मैले बामदेव कम्रेडलाई बोलाएँ, तर उहाँले आफू बालुवाटार पुगेको र भैंसेपाटी गठबन्धनबाट निस्किएको जानकारी दिनुभयो । अनि सचिवालयमा हामी अल्पमतमा पर्ने देखेपछि सोच्न बाध्य भएँ ।

त्यसपछि त बैठकको माहोल नै बदलियो । वरिष्ठ नेता झलनाथ खनाल र माधवकुमार नेपाल अक्क न बक्क भए । बैठकमा प्रधानमन्त्री ओलीले अघिल्लो बैठकमा प्रस्तुत गरेको प्रस्तावको ठोस कार्ययोजना ल्याउने सबैको अनुमान थियो । तर बैठक सुरु भएपछि देखिएको माहोलले अचम्मित बनायो । जसका बारेमा प्रधानमन्त्री बनाउने भनिएको थियो अर्थात बामदेव गौतम नै चूपचाप देखेपछि धेरैले अनुमान लगाए – दालमें कुछ काला हैं । सचिवालय सदस्य नारायणकाजी श्रेष्ठले प्रसंग उठाए– अनि बामदेव कम्रेडका सन्दर्भमा चाहिं के गर्ने ? जवाफमा ओलीले भने– उहाँलाई उपयुक्त समयमा प्रतिनिधिसभामा लैजाने र प्रधानमन्त्री बनाउने ।

लगत्तै माधव नेपालको सन्दर्भ उठ्यो । नेपालले कुरा बुझे अनि उत्तर दिए– तेस्रो अध्यक्ष मलाई स्वीकार्य छैन । बैठकको निश्कर्ष त यस्तै रह्यो । तर नेता नेपालको मन भने भत्भती पोलिरहेको थियो । आखिर के जादू चल्यो त ओलीको ? एकाएक माहोल अनुकुल बन्यो ? उत्तर खोज्न घोत्लिरहेका नेपाललाई हिजो सबै कुराको बेलिबिस्तार लाए अध्यक्ष प्रचण्डले ।आइतबार दिउँसो कोटेश्वरस्थित निवासमा पुगेका स्थायी कमिटी सदस्यहरु भीम रावल, भीम आचार्य, अष्टलक्ष्मी शाक्य, सुरेन्द्र पाण्डे र रघुजी पन्तले यसको कारण सोध्न नेता नेपाललाई आग्रह गरे ।

लगत्तै उनले प्रचण्डलाई बोलाए । बालकुमारीस्थित कृष्णलाल महर्जनको घरमा दुई नेताको भेट भयो । त्यहाँ सबै कथा सुनाए प्रचण्डले । पराजयको चरणमा रहेका ओलीका लागि बामदेवको साथ नै वरदान सावित भएको उनले बताए । शनिबार मैले बामदेव कम्रेडलाई बोलाएँ, तर उहाँले आफू बालुवाटार पुगेको र भैंसेपाटी गठबन्धनबाट निस्किएको जानकारी दिनुभयो । अनि सचिवालयमा हामी अल्पमतमा पर्ने देखेपछि सोच्न बाध्य भएँ ।

ओलीले सचिवालय बैठक सुरु हुनुअघि आफूसँग अब संस्थागत रुपमा चल्ने, केही मुख्यमन्त्री र संघीय सरकारका मन्त्री फेरबदल आपसी सहमतिमा गर्ने प्रतिबद्धता जनाएका थिए । साथै, पार्टीकै निर्देशनमा सरकार सञ्चालन गर्ने र कार्यकारी अधिकार प्रचण्डलाई मात्रै दिने बचनवद्धता गरेको पनि बताए । यसका लागि पार्टी स्थायी कमिटी बैठकमा प्रस्ताव ल्याउन समेत ओलीले प्रचण्डलाई अह्राएका छन् । यसबारे प्रष्ट पार्दै प्रचण्डले नेता नेपाललाई अब पार्टी नै सर्बेसर्वा हुने मोडेलमा प्रस्ताव ल्याउने तयारी भईरहेको जानकारी पनि दिए ।

त्यसपछि नेता नेपालको द्विविधा त शान्त भयो, तर ओलीले इमान्दारीपूर्वक निर्णयको पालना गर्छन् भन्नेमा चाहिं शंका गरे ।नेकपालाई अब कुन स्वरुपमा लैजाने र सरकारमाथिको नियन्त्रण कसरी गर्ने भन्ने कार्ययोजना प्रचण्डले तयार गरिरहेका छन् । बामदेवले धोका नदिएको भए ओली यसैपाली धराशायी भईसक्ने ठम्याई प्रचण्ड र नेपालको छ ।

बामदेव किन ओलीका पक्षमा लागे त ? भन्ने प्रश्नको उत्तर खोज्न दुवै नेताले प्रयास गरे । दुवैको निश्कर्ष यो प्रकरणमा महासचिव बिष्णु पौडेलको महत्वपूर्ण भूमिका रहेको छ । बामदेवलाई तत्कालै प्रधानमन्त्री बनाउने भन्दापनि आगामी निर्वाचनमा बनाउने रणनीति हुन सक्छ भन्दै नेताहरुले अब हुने मन्त्रिमण्डल पुनर्गठनमा बामदेव पत्नी तुलसा थापा पर्न सक्ने अनुमान गरिएको छ ।