अब हामी माझ रहेनन् कांग्रेसका अग्रज नेता एवं पूर्व राज्यमन्त्री दूर्योधन चौधरी !

९ जेठ, रुपन्देही ।  नेपाली कांग्रेसका अग्रज नेता एवं पूर्व राज्यमन्त्री दूर्योधन चौधरीकाे निधन भएको छ । वुटवलस्थित गौतम वुद्ध सामुदायिक मुट अस्पतालमा उपचारका क्रममा ७० वर्षको उमेरमा नेता चौधरीको निधन भएको हो ।

स्वर्गीय चौधरी २०४८, २०५१ र २०५६ को आमनिर्वाचनमा रुपन्देही निर्वाचन क्षेत्र नं. १ बाट प्रतिनिधिसभा सदस्यमा निर्वाचित भएका थिए । यसैक्रममा स्वर्गीय चौधरी महिला तथा सामाजकल्याण सहायक मन्त्री,आपूर्ति सहायकमन्त्री हुँदै  स्थानीय विकास राज्यमन्त्री भएका थिए ।

स्वर्गीय चौधरीले वि.सं. २०२८ सालमा भारतको वनारसबाट राजनीतिक जीवन यात्रा प्रारम्भ गरेका थिए । पार्टीको विभिन्न पदमा रहेर स्वर्गीय चौधरीले नेपालको लोकतान्त्रिक आन्दोलनमा सक्रिय भूमिका निर्वाह गरेका थिए । उनका दुई श्रीमती, तीन छोरा र एक छोरी छन ।

यसैबीच, नेपाली कांग्रेसका सभापति शेरबहादुर देउवाले उनको निधनप्रति गहिरो दुःख व्यक्त गरेका छन् । सभापति देउवाले “नेपाली कांग्रेस रुपन्देहीका अग्रज नेता एवं पूर्व राज्यमन्त्री दूर्योधन सिंह थारु चौधरीको निधनको खबरले मलाई अत्यन्त दुःखित बनाएको छ ।” स्वर्गीय चौधरीले नेपाली कांग्रेसको संगठन र नेपालको लोकतान्त्रिक आन्दोलनहरुमा सक्रिय भूमिका निर्वाह गरेका थिए ।

 पार्टीले एक अग्रज व्यक्तित्वलाई गुमाएको छ र अपूरणीय क्षति पुगेको बताउँदै सभापति देउवाले चाैधरीकाे निधनप्रति गहिरो दुःख व्यक्त गर्दै भावपूर्ण श्रद्धाञ्जली व्यक्त गरेका छन् ।

उता नेता चौधरीको निधनकाे खबरले आफु स्तब्ध र मर्माहत भएकाे रुपन्देही कांग्रेस क्षेत्र न २ का सभापति हरि लम्सालले बताएका छन् । सामाजिक सञ्जालमा एक शोक विज्ञप्ति जारी गदै सभापति लम्सालले नेपाली कांग्रेस रूपन्देहीको अभिभावक, सरल,विकासप्रेमी एवं जनप्रिय नेताको निधनले सिंगो रूपन्देही कांग्रेसलाई नै अपुरणीय क्षति पुगेको टिप्पणी गरेका छन् ।

उनले दुखको यो क्षणमा स्वर्गीय आत्माको चिरशान्तिको कामना गर्दै बैकुण्ठमा बास होस् भन्ने कामनाका साथ भावपूर्ण श्रद्धाञ्जली अर्पण गदै शोक सन्तप्त परिवारप्रति हार्दिक समवेदना प्रकट गर्दछौं , जारी गरेको विज्ञप्तिमा भनिएको छ ।