बजेट माग गर्दै प्रधानमन्त्रीलाई ज्ञापनपत्र

धीरुभाइ

११ जेठ, सप्तरी । सत्तारुढ नेपाल कम्युनिस्ट पार्टीका प्रदेश सभा सदस्यसहितका नेताहरुले रामराजा प्रसाद सिंह स्वास्थ्य विज्ञान प्रतिष्ठानको लागि बजेट बिनियोजन गर्न प्रधानमन्त्रीलाई आइतबार ज्ञापनपत्र पठाएका छन । सरकारले नीति तथा कार्यक्रममा प्रतिष्ठानलाई नसमेटिएको भन्दै जिल्ला प्रशासन कार्यालय सप्तरी मार्फत नेकपाका नेता कार्यकर्ता तथा नागरिक समाजका अगुवाहरुले प्रधानमन्त्रीलाई ज्ञापनपत्र पठाएका हुन ।

ज्ञापनपत्रमा प्रधानमन्त्रीले नै उद्घोष गरेको विकास निर्माणको कार्यलाई मूर्तरुप दिन अगाडी बढिसकेको योजनालाई बीच बाटोमा अवरोध पार्ने, बेपत्ता पार्ने प्रबृतिविरुद्ध आन्दोलित हुनुपर्ने स्थिति प्रमको कार्यकालमा आउन नदिन विश्वासकासाथ त्यसतर्फसमेत ध्यानाकर्ष गराएको छ ।

सप्तरीका प्रमुख जिल्ला अधिकारी सुनिल खनाल मार्फत प्रधानमन्त्रीलाई पठाएको ज्ञापन पत्रमा नेकपा सप्तरीका सचिव तथा प्रदेश २ सभा सदस्य गोबिन्द न्यौपाने, नेकपाका नेता तथा पूर्व सिंचाइ मन्त्री उमेश कुमार यादव, पार्टीका पूर्व सांसदहरु दानालाल चौधरी, असर्फी सदा, नेकपाका प्रदेश समिति सदस्यहरु महेशप्रसाद यादव, भागवत यादव, देवनाथ यादव राष्ट्रिय युवा संघका केन्द्रीय सदस्य निरन्जन झा, अखिल नेपाल ट्रेड युनियन महासंघका प्रदेश सचिव केदार देव, नागरिक समाज सप्तरीका अध्यक्ष थानसिंह भन्साली लगायतले हस्ताक्षर गरेका छन । .

प्रधानमन्त्री केपी शर्मा ओलीले २०७५ भदौमा प्रदेश २ सभालाई सम्बोधन गर्दै गणतन्त्रवादी नेता रामराजा प्रसाद सिंहको नामबाट सप्तरीमा स्वास्थ्य विज्ञान प्रतिष्ठान सिंह स्थापना गर्ने प्रतिबद्धता अनुसार गत आर्थिक वर्ष ०७६/०७७ को नीति तथा कार्यक्रममा समाबेश भई रु ४० करोड बजेटसमेत विनियोजन गरेको थियो ।

ज्ञापन पत्रमा चालु आर्थिक वर्ष ०७६/०७७ मा स्वास्थ्य विज्ञान प्रतिष्ठानका लागि रु ४० करोड विनियोजन हुनुको साथै स्वास्थ्य विज्ञान प्रतिष्ठानको कार्यालय, पूर्वाधार तयारी विकास समितिको गठनसँगै पदाधिकारी चयन भइसकेको तथा प्रतिष्ठानका लागि चाहिने ६१ बिघा जग्गा समेत व्यवस्था भइसकेको अवस्थामा सरकारले आगामी आर्थिक वर्षको नीति तथा कार्यक्रममा प्रतिष्ठानलाई समावेश नगरेको भन्दै निराशा बढ्ेको उल्लेख छ ।

सरकारले नीति तथा कार्यक्रममा स्वास्थ्य विज्ञान प्रतिष्ठानलाई समावेश नगरेपछि जनतामा निराशा, आशंका उत्पन्न भएकाले आर्थिक वर्ष ०७७/०७८ को बजेट वक्तब्य मार्फत स्वास्थ्य विज्ञान प्रतिष्ठान निर्माणका लागि रकम बिनियोजन गरी निर्माण कार्यलाई निरन्तरता दिन मागसमेत गरेका छन् । ज्ञापनपत्रमा प्रतिष्ठान निर्माणका लागि राजविराज नगरपालिका वडा नम्बर १० बिरौल स्थित ६१ बिघा जग्गा दिने निर्णय गरेर प्रतिष्ठानको नाममा दर्ता गराउन मन्त्री परिषदबाट निर्णय गराउन भूमि व्यवस्था मन्त्रालयमा पठाएपनि फाइल थन्काइएको भनिएकोे छ ।