क्वारेन्टाइनमा नै मृत्यु भएकी गर्भवती महिलामा कोरोना रिपोर्ट नेगेटिभ

धीरुभाइ

१४, जेठ, सप्तरी । सप्तरीको कञ्चरुप नगरपालिकामा मृत्यु भएकी गर्भवती महिलामा कोरोना भाइरस (कोभीड १९) संक्रमण रिपोर्ट नेगेटिभ भएको छ । कोरोनाको लक्षण देखिएको जिल्लाको कञ्चरुप नगरपालिकामा १८ हप्ताकी गर्भवती महिलाको मंगलबार मृत्यु भएको थियो । मृतकको कोरोना संक्रमितको तोकिएको मापदण्ड अनुसार उनको अन्तिम संस्कार पनि गरिएको छ ।

संक्रमण भएको नभएको यकिन गर्न मृत्यु पश्चात मंगलबारै स्वाब संकलन गरी पीसीआर परीक्षणको लागि धरान स्थित वीपी कोइराला स्वास्थ्य विज्ञान प्रतिष्ठान पठाइएका थियो । उनको बुधबार प्राप्त पीसीआर रिपोर्ट नेगेटिभ आएको स्वास्थ्य कार्यालय सप्तरीका निमित प्रमुख दुनियालाल यादवले जानकारी दिए ।

गर्भको चेकजाँच गराइरहेको नीजि चिकित्सको सल्लाहमा आफ्नो घर क्वारेन्टाइनमा बस्दै आएकी कञ्चनरुप नगरपालिका वडा न. ११ गोरपारकी करिब २५ वर्षीया गर्भवती महिलाको सोमबार राती धेरै ज्वरो आएको र स्वासप्रस्वासमा समस्या आएको र मंगलबार बिहान उनको मृत्यु भएको थियो ।