सनराइज बैंककाे वितरणयोग्य मुनाफा १७ कराेड ५५ लाखले ऋणात्मक, लगानीकर्तालाई टाईटाई फिस !

१३ जेठ, काठमाडौं । अघिल्लो वर्षको तेश्रो त्रैमाससम्म खुद मुनाफामा अर्बपति क्लबमा रहेको सनराइज बैंक अहिले सो क्लबबाट बाहिरिएको छ तर ९ महिनाको अवधिमा कर्मचारी खर्चले भने अर्ब छुन लागेको छ ।

आर्थिक वर्ष ०७६/७७ को तेश्रो त्रैमासको वित्तीय प्रतिवेदन अनुसार ६ वटा बैंकको वितरण योग्य मुनाफा ऋणात्मक भएकोमा सनराइज बैंकले पनि वितरणयोग्य मुनाफा ऋणात्मक भएको बैंकको रुपमा आफुलाई सुचीकृत गरेको छ । नयाँ लेखा व्यवस्था अनुसार बैंकहरुले अहिले व्याज नउठेपनि निकट भविष्यमा व्याज उठ्छ भनी आफ्नो नाफामा देखाउने गर्छन । यसरी उठ्दै नउठेको व्याज आम्दानी देखाउँन मिले पनि बैंकले सो आम्दानीलाई वितरणयोग्य मुनाफामा देखाउन पाउँदैन । यसरी वितरण योग्य मुनाफा ऋणात्मक हुँदा कम्पनीले लगानीकर्ताहरुलाई लाभांश खुवाउने अवस्था निकै कम हुन्छ । लगानीकर्तालाई टाईटाई फिस हुने भएकाे छ ।

मारवाडी बैंकको रुपमा चिनिएको सनराइज बैंक लिमिटेड संचालक समितिको अध्यक्षमा मोतीलाल दुगड रहेका छन् । त्यस्तै अन्य संचालक सदस्यहरुमा बच्छराज तातेड, मालचन्द दुगड , शैलेन्द्र गुरागाँई, शारदा शर्मा, दीपक नेपाल र ओमकृष्ण जोशी रहेका छन् । यसैगरी बैंकको उच्च व्यवस्थापनमा जनकशर्मा पौडेल सीईओको रुपमा कार्यरत छन् । यस अघि ग्लोबल आईएमई बैंकका अध्यक्ष चन्द्र ढकालसँग तालमेल नमिलेपछि जनकशर्मा पौडेलले ग्लोबल आईएमई बैंक छाडेका थिए । उनी सनराईज बैंकमा सीईओको रुपमा आएपछि पनि सनराईज बैंकले सोचे अनुरुप प्रगति गर्न सकेकाे छैन ।

बैंकमा मोतीलाल दुगडको नाममा ५ दशमलव ९४ प्रतिशत शेयर स्वामित्व रहेको छ भने मालचन्द दुगडको नाममा ४ दशमलव ७७ प्रतिशत शेयर स्वामित्व रहेको छ । कम्पनीमा ५१ दशमवल १० प्रतिशत संस्थापक शेयर स्वामित्व छ भने ४८ दशमलव ९० प्रतिशत साधारण शेयरको स्वामित्व रहेको छ ।

कम्पनीको आर्थिक वर्ष ०७६/७७ को तेश्रो त्रैमास र आर्थिक वर्ष ०७५/७६ को तेश्रो त्रैमासलाई दाँजेर हेर्दा :

Sunrise Bank   (Report Based on Q3, FY: 76/77)
	FY 2076/77	FY 2075/76	Diff
	Third Qt	Third Qt	%
Income Statement (Rs in 000)
Net Interest Income	2,994,392	2,643,772	13
Impairment Charge/(Reversal)	1,010,586	279,828	261
Personnel Expenses	971,982	790,300	23
Operating Profit	1,334,662	1,753,792	-24
Net Profit	935,283	1,226,099	-24

खुद ब्याज आम्दानीमा १३ प्रतिशतको वृद्धि :
बैंकको प्रमुख आम्दानीको श्रोतकाे रूपमा रहेको खुद ब्याज आम्दानी सामान्य रूपमा बढेको छ । बैंकले चालु आर्थिक वर्षको तेश्रो त्रैमासमा २ अर्ब ९९ करोड खुद व्याज आम्दानी गरेकोमा गत आर्थिक वर्षको तेश्रो त्रैमासमा कम्पनीले २ अर्ब ६४ करोड खुद व्याज आम्दानी गरेको थियो । यसरी खुद व्याज आम्दानी १३ प्रतिशतले मात्र बढेको छ ।

खुद मुनाफामा पहिरो:
संचालन मुनाफा २४ प्रतिशतले घटेसँगै कम्पनीको खुद मुनाफा पनि २४ प्रतिशतले घटेको छ । गत आर्थिक वर्षको तेश्रो त्रैमासमा १ अर्ब २२ करोड खुद मुनाफा गरेको कम्पनीले अहिले भने ९३ करोड ५२ लाख मात्र खुद मुनाफा गरेको छ ।जोखिम बापत बैंकले निकै धेरै रकम व्यवस्थापन गर्नु परेको छ । गत आर्थिक वर्षको तेश्रो त्रैमासमा २७ करोड ९८ लाख जोखिमबापत व्यस्थापन गर्नु परेकोमा अहिले यो त्रैमासमा आउँदासम्म १ अर्ब १ करोड व्यवस्थापन गर्नु परेको छ । यसले गर्दा बैंकको नाफामा पहिरो गएको देखिन्छ । त्यस्तै खुद मुनाफा २४ प्रतिशतले घटेको अवस्थामा कम्पनीको कर्मचारी खर्च भने निकै धेरै बढेको छ । कर्मचारी खर्च २३ प्रतिशतले वृद्धि हुँदै ९७ करोड १९ लाख पुगेको छ ।

जगेडा कोष बढ्यो, संचित मुनाफा दुवै घट्दै :
कम्पनीको जगेडा कोषमा २६ प्रतिशतको वृद्धि देखिएको छ । गत आर्थिक वर्षको चौथो त्रैमासमा २ अर्ब ८१ करोड रहेको जगेडा कोष अहिले ३ अर्ब ५३ करोड पुगेको छ । तर संचित मुनाफा भने ८१ प्रतिशतले घट्दै २२ करोड ६० लाख पुगेको छ । शेयर प्रीमियम शिर्षकमा भने कुनै रकम छैन ।

Sunrise Bank Report Based on Q3, FY : 76/77)
	This Quarter End	Immediate Previous Year End	Diff
			%
Balance Sheet  (Rs in 000)
Share Capital	8,967,811	8,152,555	10
Share Premium	0	127,161	0
Retained Earnings	226,032	1,175,249	-81
Reserves	3,539,327	2,815,184	26
Deposit	86,355,780	75,432,150	14
Loan	80,141,765	68,865,810	16

Note : Loan and Advances Covers Customers Only

निक्षेप र कर्जा प्रवाहमा राम्रो वृद्धि :
बैंकले चालु आर्थिक वर्षको तेश्रो त्रैमास र अघिल्लो आर्थिक वर्षको चौथो त्रैमासलाई आधार मान्दा बैंकको निक्षेप संकलन १४ प्रतिशतले वृद्धि गर्न सफल भएको छ भने कर्जा प्रवाह १६ प्रतिशतले वृद्धि गर्न सफल भएको छ । बैंकले चालु आर्थिक वर्षको तेश्रो त्रैमासमा ८६ अर्ब ३५ करोड निक्षेप संकलन गरी ८० अर्ब १४ करोड कर्जा प्रवाह गरेको छ ।

प्रतिशेयर आम्दानी १३ रुपैयाँ :
वार्षिक प्रतिशेयर आम्दानी १३ रुपैयाँ ९१ पैसा छ । कम्पनीकाे वार्षिक प्रतिशेयर आम्दानीमा निकै ठुलो गिरावट आएको छ ।

Sunrise Bank
Key Indicators
Market Price (Rs)	221
Earning Per Shares (Rs)	13.91
Book Value (Rs)	141.99
Pe Ratio (Times)	15.86
PB Ratio (Times)	1.56
Grahm Number (Rs)	211

Note: Latest Market Price

मुल्य आम्दानी अनुपात १६ गुणा:
कम्पनीको अन्तिम बजार मूल्य २२१ लाई आधार मान्दा कम्पनीको मूल्य आम्दानी अनुपात १६ गुणा आउँछ ।

वितरणयोग्य मुनाफा:
कम्पनीको तेश्रो त्रैमाससम्म वितरणयोग्य मुनाफा १७ करोड ५५ लाख ऋणात्मक रहेको छ । गत आर्थिक वर्षको तेश्रो त्रैमाससम्म कम्पनीको वितरण योग्य मुनाफा ९१ करोड ३४ लाख माथि थियो । यसरी वितरण योग्य मुनाफामा निकै ठुलो गिरावट आएको छ ।

Sunrise Bank   (Report Based on Q3, FY : 76/77)
	FY 2076/77	FY 2075/76	Diff
	Third Qt	Third Qt*	%
Rs in 000
Distributable Profit	(175,521)	913,425	-119
* Based on Third Qt Report (75/76)

केही महत्वपूर्ण अनुपातहरु :

Sunrise Bank  (Report Based on Q3, FY: 76/77)
	FY 2076/77	FY 2075/76	Diff
	Third Qt	Third Qt	%
Ratios (%)
Capital Fund to RWA	14.47%	11.87%	22
CCD Ratio	76.37%	79.73%	-4
Non-Performing Loan	1.32%	1.37%	-4
Base Rate	10.02%	10.43%	-4
Spread Rate	4.86%	4.37%	11

निस्कर्ष:
सनराइज बैंकले प्रगतिको पथमा भन्दा पनि ठीक उल्टो पथमा हिडेको देखिन्छ । वितरणयोग्य मुनाफा ऋणात्मक हुँदा  लगानीकर्ता अब निराश बन्ने सम्भावना धेरै छ । बैंकले आफ्नो वित्तीय अवस्थामा प्रगति गर्न नसकेपनि बैंकले कर्मचारीहरुको तलब भत्ता शिर्षकमा भने २३ प्रतिशतको वृद्धि गरेकाे देखिएको छ । बैंकको  वितरण योग्य मुनाफालाई अन्य वाणिज्य बैंकसँग दाँजेर गर्दा सनराईज बैंक अन्तिम ३ मा परेको देखिन्छ ।