बालुवाटारमा बजेटबारे दुई छुट्टाछुट्टै बैठक

१५ जेठ, काठमाडौं । कोरोना कहरका बीच धेरैले चासोका साथ प्रतिक्षा गरिरहेको आर्थिक बर्ष २०७७/०७८ को बजेट बारे अन्तिम निर्णय लिन आज प्रधानमन्त्री निवास बालुवाटारमा दुई छुट्टाछुट्टै बैठक बस्ने भएको छ ।

प्रधानमन्त्री कार्यालय स्रोतका अनुसार अहिले १ बजेदेखि प्रधानमन्त्री केपी शर्मा ओलीको अध्यक्षतामा राष्ट्रिय योजना आयोगको पूर्ण बैठक बसिरहेको छ । सो बैठक समापनको लगत्तै २ बजे मन्त्रीपरिषदको बैठक बसेर बजेटबारे निर्णय गर्ने बताइएको छ । आजै ४ बजे संसदको सयुक्त बैठकमा अर्थमन्त्री डा. यूवराज खतिवडाले आगामी आर्थिक बर्षको बजेट भाषण गर्दैछन् ।

बिगतमा राष्ट्रप्रमुख वा राष्ट्रपतिलाई बजेट पेश गर्ने अघिल्लै दिन बजेटबारे सारांशमा अर्थमन्त्रीले बिफ्रिङ गर्ने प्रचलन थियो । तर यसपटक राष्ट्रपति विद्यादेवी भण्डारीलाई बजेटबारे ब्रिफिङ भएको छैन । राष्ट्रपति कार्यालय स्रोतका अनुसार बजेटको ब्रिफिङ भनेर अर्थमन्त्रीले अहिलेसम्म समय लिएका छैनन् । बजेटबारे राष्ट्रपतिलाई ‘ब्रिफिङ’ गर्नैपर्ने अनिवार्य व्यवस्था भने छैन ।

अर्थमन्त्री खतिवडाले कोरोनापछिको अर्थतन्त्र, निजी क्षेत्रलाई विशेष राहत प्याकेज, स्वास्थ्य, पूर्वाधार, रोजगारी सिर्जना, कृषि तथा प्रविधिमा नयाँ कार्यक्रमका साथ बजेट आउने अपेक्षा गरिएको छ । जेठ १५ मै बजेट ल्याउने संवैधानिक व्यवस्था छ ।