सप्तरीमा सुरक्षाकर्मी र कार्यालय सहयोगी पनि संक्रमित, आइसोलेशन बेड भन्दा संक्रमितको सख्या धेरै

धीरुभाइ

१५, जेठ सप्तरी । सप्तरीमा आइसोलेशन बेड संख्या भन्दा कोरोना संक्रमितको संख्या बढी भएकोले उपचारमा समस्या भएको छ । जिल्लामा कोरोना भाइरस संक्रमितको संख्या थप्दै गएपछि उनीहरुलाई सुरक्षित उपचार गर्न अस्पतालमा आइसोलेशन बेड (शैय्या)को अभाव छ ।

जिल्लामा कूल २९ जना संक्रमित भएका छन् भने आइसोलेशन बेड २४ मात्र छन् । क्षमता भन्दा बढी संख्याका संक्रमितलाई कहाँ राखेर कसरी उपचार गर्ने अन्यौल बढेको छ । यसको लागि जिल्ला संकट व्यवस्थापन समितिको बैठक बस्न लागेको बताइएको छ । अहिले संक्रमितहरुलाई क्वारेन्टाइनमै राखिएको छ ।

संक्रमितहरु क्वारैन्टाइनमै राखिएको बोदेबर्साइन नगरपालिका स्वास्थ्य संयोजक बैजनाथ साहले भने स्वास्थ्य कार्यालयले अहिले चार बेड मात्र खाली रहेको जानकारी दिएको छ । चार जनालाई पठाउन मिल्ने तर, अरुको बारेमा त्यहाँको निर्देशन के आउँछ त्यही अनुसार गर्ने ।

हिजो बुधबार ११ र बिहीबार १४ गरी २५ जना लगातार नयाँ संक्रमित थपिएपछि आइसोलेशन बेडको अभाव भएको हो । यसअघि चार जनाको आइसोलेशनमा उपचार हुदै आएको छ । राजविराज स्थित गजेन्द्र नारायण सिंह अस्पतालको कोरोना आइसोलेशन वार्डमा २४ बेड क्षमता मात्र रहेको अस्पतालका मेडिकल सुपरिटेन्डेन्ट डा. चुमनलाल दासले जानकारी दिए । बेडमा १७ जना संक्रमित र दुई जना संभावित संक्रमित गरी १९ जना भर्ना भइसकेको उनले भने, थपिएका नयाँ संक्रमितलाई अस्पतालमा ल्याएर उपचार गर्ने बेड अभाव छ ।

साइँकृष्णमा आइसोलेशनको तयारी

नगर स्थित लामो समयदेखि बन्द रहेको साँई कृष्ण मेडिकल भवनमा राजविराज नगरपालिकाले सञ्चालनमा राखिएको क्वारेन्टाइनलाई अन्यत्र सारेर त्यस भवनमा आइसोलेशन बेड तयारी भइरहेको उनले बताए । तत्काल ५७ बेडको आइसोलेशन तयारी भइरहेको उनले एक÷दुई दिन तयारीमा समय लाग्ने बताए । यो तयार नभएसम्म बिहीबार बोदेबराइन क्वारेन्टाइनमा थपिएको नयाँ संक्रमितहरुलाई तत्काल त्यहीँ राख्ने उनले बताए ।

सुरक्षाकर्मी र कार्यालय सहयोगी पनि संक्रमित
आज थपिएका १४ मध्ये एक हबल्दारसहित १३ जना जिल्लाको बोदेवर्साइन नगरपालिका ५ स्थित चन्द्रा शत्रुध्न माध्यमिक विद्यालयको क्वारेन्टाइनमा स्वाब संकलन गरिएको थियो । संक्रमित एक जना विष्णुपुर गाउँपालिकाका ३२ वर्षीय पुरुष रहेका छन । यसअघि बुधबार बोदेवर्साइन नगरपालिकामा आठ जना संक्रमितका भएका छन । यससँगै सो नगरपालिकामा मात्रै संक्रमितको संख्या १९ पुगेको स्वास्थ्य कार्यालय सप्तरीका निमित प्रमुख दुनियालाल यादवले जानकारी दिए । बोदेबरसाइन नगरपालिकाका संक्रमितहरु १९ देखि ४७ वर्ष मुनिका रहेका छन ।

यस्तै तीमध्ये सोही नगरपालिकाको क्वारेन्टाइनको सुरक्षामा खटिएका पर्सा जिल्ला घर भई इलाका प्रहरी कार्यालय बोदेबर्साइनमा कार्यरत ३७ वर्षीय प्रहरी हबल्दार र क्वारेन्टाइनमा खटिएको २७ वर्षीय कार्यालय सहयोगी बोदेबर्साईन ८ रजपट्टिका एक जनामा पनि कोरोना संक्रमण पुष्टि भएको छ । त्यसैगरी उक्त क्वारेन्टाइनमा स्वाब संकलन गरिएको खडक नगरपालिका ३ बनरझुलाका १९ वर्षीय पुरुष संक्रमित भएको छ ।

स्वास्थ्य कार्यालय सप्तरीबाट खटिएको स्वास्थ्यकर्मीको टोलीले नौ दिन अघि उक्त क्वारेन्टाइनमा बस्दैआएका २४ जनाको स्वाब संकलन गरी परीक्षणकालागि राष्ट्रिय जनस्वास्थ्य प्रयोगशाला टेकु पठाएको थियो ।

संक्रमितहरु करिब दुई साता अघि खुल्ला सिमाना भएर भारतबाट आएका थिए । जिल्लाको ३७२ जनाको स्वाब परीक्षण रिपोर्ट आउन बाँकी रहेको स्वास्थ्य कार्यालय निमित प्रमुख यादवले बताए । संक्रमितहरु नेपालको बझाङ्ग, भारतको हरियाण, मध्यप्रदेश, चन्ढीगढ, छपरा, गुडगाउँ, लगायतका स्थानबाट आएका हुन ।