बारामा थप तीन जनामा कोरोनाकाे पुष्टि

१७ जेठ, बारा । बारामा शनिबार थप तीन जनामा कोरोना संक्रमण पुष्टि भएको छ । आज थपिएका सिम्रौनगढ नगरपालिका वडा नम्बर ३ का १८ वर्ष र ३५ वर्षका तथा सुवर्ण गाउँपालिकाको हर्दियाका एक पुरुषमा संक्रमण पुष्टि भएको हो ।

सिम्रौनगढ नगरपालिका वडा नम्बर ३ मा संक्रमण पुष्टि भएका दुवै व्यक्ति भारतबाट आएर किसुनपुरस्थित मदरसा क्वारेन्टिनमा बस्दै आएका थिए । उक्त क्वारेन्टिनमा ३७ जनाको पीसीआर परीक्षण गरिएको र सो मध्ये २ जनामा संक्रमण पुष्टि भएको सिम्रौनगढ नगर स्वास्थ्यले बताएको छ ।

बारामा संक्रमित राखेर उपचार गर्ने आइसोलेसन कक्ष खाली नभएकाले उनीहरुलाई वीरगञ्जस्थित गण्डक कोभिड अस्पताल लैजाने तयारी भइरहेको उनले बताए ।