श्रमिकको पारिश्रमिक कटौती गर्न कुवेत सरकारले दियो अनुमती

पुष्पराज खड्का

२० जेठ, कुवेत । कुवेत सरकारले यहाँ रहेका निजी रोजगारदाता कम्पनीहरुलाई पारिश्रमिक कटौती गर्न पाउने अनुमती दिएको छ । सो अनुमती प्रदान गर्नको लागी कुवेत सरकारले सन् २०१० मा बनेको निजी क्षेत्रका श्रमिक सम्बन्धी ऐनको बुँदा नं. ६ मा रहेको व्यवस्थालाई संशोधन गरेको छ ।

संशोधित प्रवधान अनुसार कुवेतमा कोरोना भाइरसको कारणले आर्थिक गतिविधीमा असर परेका निजी रोजगारदाता कम्पनीहरुले कोरोना संकट अवधी भरको आफ्ना कामदारहरुका पारिश्रमीक कटौती गर्न सक्ने छन् । त्यसरी कटौती गर्न सकिने पारिश्रमीकको पर्सेन्टेज तथा अनुपात भने खुलाइएको छैन ।

कोरोना माहामारीका कारणले आर्थिक गतिविधीमा पर्न गएको असरलाई र श्रम बजारलाई सम्बोधन गर्न सरकारले संसदको अर्थ समितीलाई नयाँ संशोधित श्रम नियम २०२० नं. ८६ सिफारिस गरेको हो । पारिश्रमिक कटौती सम्बन्धी बनेको नयाँ कानुन कुवेत सरकारले घोषणा गरेको कोरोना प्रभाव अवधीसम्म मात्रै लागु हुने अस्थायी प्रावधान भएको कुरा स्पस्ट पारिएको छ ।

कामदारको तलव कटौती सम्बन्धी नयाँ नियमले कुवेतमा रहेका बाह्य मुलुकका कामदारहरु बढि मर्कामा पर्ने भएका छन् । त्यस्तै कुवेतमा कार्यरत ७५ हजार बढी नेपाली कामदार पनि मर्कामा पर्ने अनुमान गरिएको छ।