ट्रेड युनियन नुवाकोटद्वारा स्वास्थ्यकर्मीलाई पीपीई हस्तान्तरण

२१ जेठ, बिदुर । नेपाल ट्रेड युनियन कांग्रेस नुवाकोटले बेलकोटगढी नगरपालिकामा कार्यरत स्वास्थ्यकर्मीहरुका लागि ब्यक्तिगत सुरक्षा उपकरण ‘पीपीई’ उपलब्ध गराएको छ ।

बुधबार नगरपालिकाको कार्यालय बाघखोरमा युनियनका जिल्ला अध्यक्ष शिव देबकोटाले नगर उपप्रमुख कबिता ढुँगानाको रोहवरमा स्वास्थ्य संयोजक सत्येन्द्र शाहलाई नेपाली कांग्रेसका केन्द्रीय सदस्य बहादुरसिंह लामाको सहयोगमा प्राप्त ५ थान पीपीई हस्तान्तरण गरेका हुन ।

त्यसक्रममा नगर उपप्रमुख ढुँगानाले ट्रेड युनियनले उपलब्ध गराएको सामग्रीबाट स्वास्थ्यकर्मीको मनोबल उच्च राख्न महत्त्वपूर्ण भुमिका निर्बाह गर्ने धारणा ब्यक्त गरिन । ट्रेड युनियन नुवाकोटले यसअघि लिखु र सुर्यगढी गाउँपालिकाका स्वास्थ्यकर्मीलाई पीपीई तथा बाहिरि जिल्ला बाट नुवाकोट आई श्रम गरिरहेका एकसय ५० भन्दा बढी श्रमिकलाई राहत उपलब्ध गराईसकेको युनियनले जनाएको छ ।