जानकी गाउँपालिकाको एउटै वडामा ४० सङ्क्रमित

२२ जेठ, बाँके । बाँकेको जानकी गाउँपालिकाको एउटै वडामा ४० कोरोना सङ्क्रमित भेटिएका छन् । भेरी अस्पताल नेपालगञ्जको पीसीआर प्रयोगशालामा गरिएको परीक्षणमा भारतसँग सीमा जोडिएको जानकी –१ साइगाउँका ४० जनाको रिपोर्ट पोजेटिभ आएको जिल्ला स्वास्थ्य कार्यालय बाँकेका कोरोना फोकल पर्सन नरेश श्रेष्ठले जानकारी दिए ।

उनका अनुसार सङ्क्रमित सबै १५ देखि ३२ वर्षीय युवा छन् । उनीहरु सबै भारतबाट फर्केर क्वारेन्टइनमा बस्दै आएका थिए गाउँपालिकामा क्वारेन्टइनमा बस्दै आएका १२० जनाको स्वाब परीक्षण गर्दा ४० जनामा सङ्क्रमण देखिएको हो । यसअघि सङ्क्रमित शून्य थिए ।

एउटै वडामा ठूलो सङ्ख्यामा सङ्क्रमित भेटिएपछि आइसोलेशन व्यवस्थापनमा समस्या भएको गाउँपालिका अध्यक्ष रामनिवास यादवले जानकारी दिए ।  आजै नेपालगञ्ज १२ र १५ मा एकएक गरी दुई जना सङ्क्रमित थपिएका छन् । यससहित बाँकेमा सङ्क्रमितको दुई सय ५५ पुगेका छन् ।