झापाका स्वास्थ्यकर्मीले दिए घर बहालमा बस्नेलाई राहत

झापा संवाददाता

३० जेठ, काठमाडौं । झापाको दमक नगरपालिका वार्ड नं. ६ बस्ने घरधनि बुद्धिशेखर भट्टराईले आफ्नो घर बहालमा बसिरहेका पसल तथा व्यत्तिहरुलाई १५ दिनको बहाल रकम छुट गरिदिने घोषणा गरेका छन् । दमक बजारको मुटुमा रहेको निजको २ तले घरमा हाल पुस्तक पसल, प्रेस, ब्युटि पार्लर, फैन्सी पसल, मोबाईल बिक्री केन्द्रहरु सञ्चालनमा रहेका छन् ।

कोरोना रोगको (कोभिड १९) विश्वव्यापी माहामारीका कारण बिगत २ महिना भन्दा बढी समयदेखि व्यापार, पसल बन्द भै कारोबारसमेत अस्तव्यस्त भएको छ । बजार पसल बन्द भएका कारण व्यापारीहरुमा पर्न गएको आर्थिक मारलाई ध्यानमा राखेर व्यापारीहरुलाई केही हदसम्म भए पनि आर्थिक भार कम होस् भनी यस्तो निर्णय लिईएको घर धनि बुद्धिशेखर भट्टराईले नेपालबहसलाई बताए ।

व्यापारीहरुलाई थप हौसला प्रदान गर्न गत बैशाख २०७७ देखि चैत्र २०७७ सम्म (एक बर्षसम्म) पानीको महशुल नलिइने जानकारी दिंदै घरबहाल वापत तिर्नुपर्ने रकम महिनाको ७ गते भित्रैमा भुक्तानी गरे सम्पूर्ण भाडा रकममा तीन प्रतिशत रकम एक बर्ष भरी नै छुट दिने निर्णय आफुले लिएको घर धनि भट्टराईले बताए ।

दमककै भद्र प्रतिष्ठित, समाजसेबी, दमक जेसिसका पूर्वअध्यक्ष, लायन्स क्लव अफ माउण्ट एभरेष्टका कोषाध्यक्ष, भट्टराई कुलबंश प्रतिष्ठान दमक नगर समितिका अध्यक्ष लगायत रेडक्रस, जेष्ठ नागरिक प्रतिष्ठान दमक सहितका बिभिन्न संघ संस्थामा आबद्ध भई सामाजिक अगुवाई गर्दै आएका भट्टराईको यस कार्यबाट घर बहालका बिषयमा के कस्तो निर्णय गर्ने होला ? भनेर द्विबिधामा रहेका अन्य घरधनिहरुलाई समेत सजिलो बनाई दिएको छ ।

भट्टराई क्लिनिकका प्रोपराईटारसमेत रहेका बौद्धिक व्यक्तित्व बुद्धिशेखर भट्टराईलाई दमक क्षेत्रकै एक अनुभवी स्वास्थ्यकर्मीका रुपमासमेत चिनिने गरिएको छ । भट्टराईको यो निर्णयका लागि हाम्रो पनि साधुबाद र सलाम रहेको छ ।