सरकारसँग १० अर्बको हिसाब माग्दै नेबिसंघद्धारा प्रदर्शन

१ असार, काठमाडौं ।  नेपाली कांग्रेसको भातृ संस्था नेपाल विद्यार्थी संघले कोरोना भाइरस रोकथाम तथा नियन्त्रणमा सरकारले गरेको खर्च पारदर्शी हुनुपर्ने बताएको छ।

सरकारले कोरोना नियन्त्रणमा भएको खर्चबारे सार्वजनिक गरिसकेको अवस्थामा नेविसंघले सोमबार काठमाडौंस्थित बानेश्वरमा प्रदर्शन गर्दै केमा कति रकम खर्च भएको पारदर्शी ढंगबाट सार्वजनिक गरिनुपर्ने माग राखेको हो।

नेविसंघले ‘सरकार, दश अर्बको हिसाब खोइ ?’ जस्ता प्लेकार्ड बोकेर प्रदर्शन गरेका हुन् । नेविसंघ महामन्त्री दीपक भट्टराईले सरकारले कोरोना नियन्त्रण र रोकथाममा गरेका खर्च पारदर्शी नभएकोले प्रदर्शन गर्दै खबरदारी गरिएको बताए।

नेबिसंघले देशैभरिका क्वारेन्टाइन स्थल सुरक्षित र व्यवस्थित बनाउन सरकारले नसकेको पनि बताएको छ। क्वारेन्टाइनमा  महिलाको बलात्कारका घटना सार्वजनिक हुनुले क्वारेन्टाइन व्यवस्थापन र सुरक्षामा सरकार चुकेको देखिएको बताएको छ ।

भ्रष्टाचारविरुद्ध प्रदर्शनमा उत्रेको नेपाल विद्यार्थी संघका कार्यकर्ताहरुले प्रधानमन्त्री केपी शर्मा ओलीको तस्बिर जलाएका छन् । नेविसंघ अध्यक्ष राजीव ढुंगानासहित केन्द्रीय पदाधिकारीको उपस्थितिमा नेविसंघ सडक प्रदर्शनमा उत्रिएको हो ।