क्वारेन्टाइनबाट घर गएका एक युवकको मृत्यु, रिपोर्ट नआउँदै अन्त्येष्टि

५ असार, दार्चुला । दार्चुलामा आरडीटी टेस्टको रिपोर्ट नेगेटिभ आएपछि क्वारेन्टाइनबाट घर गएका एक युवकको मृत्यु भएको छ । बिहीबार साँझपख उनको घरमै मृत्यु भएको हो ।

मृत्यु हुनेमा मार्मा गाउँपालिका–३ का २१ वर्षीय युवक छन् ।  मृतक युवकको बिहीबार साँझ नै स्वाब संकलन गरी परीक्षणका लागि धनगढी पठाइएको छ ।

गाउँपालिकाका स्वास्थ्य संयोजक चन्द्रसिंह धामीका अनुसार उनी जेठ ३० गते क्वारेन्टाइनबाट घर गएका हुन् । बेंग्लौरबाट जेठ २७ गते गौरीफन्टा नाका हुँदै आएका उनको धनगढी सेती प्रादेशिक अस्पतालमा गरिएको आरडीटी टेस्टको रिपोर्ट नेगेटिभ आएको थियो ।

यसैबीच, मृतक युवकको अन्त्येष्टि बिहीबार साँझ नै गरिएको छ । सुरक्षा सजगता अपनाएर मृतक युवकको अन्त्येष्टि गरिएको छ । मृतक युवकको अन्त्येष्टिमा परिवारका सदस्यसहित जम्मा सात जना मात्रै सहभागी भएको र अन्त्येष्टिमा सहभागी सबै जना अहिले होम क्वारेन्टाइनमा बसेका छन् ।