प्रचण्डले फेरि आलोपालो सरकारको सहमति ब्युताउँदा ओली त्रसित !

१० असार, काठमाडौं । २०७५ जेठ २ गते राती आलोपालो सरकार सञ्चालन गर्ने सहमति प्रचण्डले स्थायी कमिटी बैठकमा फेरि ब्युताएपछि प्रधानमन्त्री तथा नेकपा अध्यक्ष केपी शर्मा ओली झस्किएका छन । बुधबारदेखि शुरु भएको नेकपाको स्थायी कमिटी बैठकको शुरुमै बोलेका प्रचण्डले आफूसँग भएको सहमति ओलीले कार्यान्वयन नगरेको गुनासो गरे ।

उनले सहमति कार्यान्वयन नहुँदा पार्टी एकता टुंगोमा पुग्न नसकेको बताए भने पार्टीभित्र आन्तरिक असन्तुष्टि बढेको समेत स्पष्ट पारे । केही समयअघिसम्म ०७५ जेठ २ गते भएको आलोपालो सरकार सञ्चालन निकै चर्चामा थियो । तर यो विषयले पछि आलोचना बढेपछि पाँच बर्ष नै ओली प्रधानमन्त्री रहने र प्रचण्ड पार्टी कार्यकारी अध्यक्ष बन्ने नयाँ सहमति बनेको थियो ।

प्रचण्डले कार्यकारी अध्यक्षको जिम्मेवारी पाएपनि ओलीले त्यसलाई गम्भिरतापूर्वक नलिएपछि नेकपाभित्र आन्तरिक सहमति खैलाबैला छ । जसले बुधबारको स्थायी कमिटी बैठकमा समेत ठाउँ पायो । ओलीको कार्यशैलीबाट नेकपा अध्यक्ष प्रचण्ड मात्रै होइनन, वरिष्ठ नेता झलनाथ खनाल, माधव नेपाल, उपाध्यक्ष बामदेव गौतमसहितका नेताहरु पनि असन्तुष्ट छन ।

प्रचण्डले स्थायी कमिटी बैठकमा यो सहमति फेरि उप्काएपछि ओलीको आलोचना थप बढ्ने अनुमान गरिएको छ । यद्यपी प्रधानमन्त्री ओलीले जवाफमा आफूबाट गल्ती कमजोरी भए स्वीकार गरेर अघि बढ्ने बताएका छन ।

स्थायी कमिटी बैठकमा बोल्दै ओलीले विगतका सहमति महत्वपूर्ण भएका, केही फेरि सहमति भएका र सबै विषयलाई अब परिमार्जन गरेर हेर्नुपर्ने बताए । उनले सहमति भन्दा पनि आवश्यकताका आधारमा अघि बढ्न सके पार्टी र जनताको हित हुने पनि दाबी गरे ।

देशमा कोरोना महामारी फैलिएका बेला एकता र आपसी सहमति चाहिएको भन्दै विगतका विषयलाई कोट्याएर आशंका बढाउन नहुने उनले बताए । एमसीसीका विषयमा छलफल गर्न बोलाइएको बैठकमा पार्टी एकता, कोरोना नियन्त्रण, रुकुम सोती घटना, सीमा विवाद, बैठक भत्ता लगायतका विषयमा पनि छलफल हुनेछ ।

तर विगतमा आफैले सहमति गर्ने र कार्यान्वयन गर्ने बेला पन्छिने ओलीको कार्यशैलीबाट आजित भएका नेकपाका नेताहरु यसपटक स्थायी समितिमा बाझाबाझ गर्ने मनस्थितिमा पुगेका छन । यसअघि नेकपा फुटाउने गरी अध्यादेश ल्याउँदा झण्डै सत्ताबाट चिप्लिन लागेका ओलीलाई प्रधानमन्त्रीबाट हटाउने तयारी पनि भएको थियो ।

तर पछि ओलीले आत्मआलोचना गरेपछि यो विषय साम्य भएपनि नेताहरु भने ओलीसँग सन्तुष्ट हुन सकेका छैनन । एक हप्तासम्म चल्ने स्थायी समिति बैठकमा यसबारेमा गम्भिर छलफल हुने अपेक्षा छ । नेताहरुको असन्तुष्टि सम्बोधन गर्न मन्त्रीहरु फेर्ने र असन्तुष्ट नेताहरुलाई केही लाभका पद दिने तयारी पनि छ ।

यद्यपी यसका लागि बैठकमा भन्दा ओली, प्रचण्ड र माधव नेपाल गुटबीच सहमति हुने गरेको छ । तर यसको मूलकारण स्थायी समितिमा उठ्ने विषय र त्यसले ल्याउने तरंगमा निर्भर हुन्छ ।