रुकुम घटनामा वडाध्यक्षसहित २३ जनालाई थुनामा पठाउन अदालतको आदेश

१० असार, काठमाडौं । लामो बहस, छलफल र विवादपटि रुकुम पश्चिम सोती घटनामा दोषी देखिएका वडाध्यक्षसहित २३ जनालाई पुर्पक्षका लागि थुनामा पठाउन अदालतले आदेश दिएको छ । जाजरकोटका युवा नवराज विकसहित ६ जनाको हत्या गर्ने सोतीका वडाध्यक्ष डम्बर मल्लसहित २३ जनालाई पुर्पक्षका लागि थुनामा पठाउन जिल्ला अदालत रुकुम पश्चिमले आदेश दिएको हो ।

न्यायाधीश विद्याराज पौडेलको इजलासले डुम भन्दै घरबाट लखेट्ने युवतीकी आमा प्रकाशी मल्ललाई एक लाख रुपैयाँ धरौटीमा छाड्ने आदेश दिएको छ । आमासँगै इन्द्रबहादुर मल्ल, तिलबहादुर मल्ल र दिपेन्द्र चन्दलाई पनि साधारण तारेखमा छाड्न अदालतले आदेश दिएको छ ।

उनीहरु बाहेक युवाहरुको हत्यामा सलंग्न वडाध्यक्ष मल्ल, युवतीका बुवा वीरबहादुर मल्ल, दाई लगायत २३ जनालाई पुर्पक्षका लागि थुनामा पठाइएको हो ।