संकटमा होटल व्यवसायी, घरभाडा छुट नदिए आन्दोलन गर्ने चेतावनी

११ असार, काठमाडौं । लकडाउनको समयमा भाडा छुट नपाएको र व्यापार पनि नभएको भन्दै व्यवसायीले आन्दोलन गर्ने तयारी गरेका छन । सरकारले भाडा छुट दिन घरभेटीलाई आग्रह गरेको भएपनि कुनै निर्देशन जारी गर्न नसक्दा डेरावाल तथा व्यवसायी भाडा तिर्न बाध्य छन ।

यही समस्या झेलिरहेका होटल व्यवसायीले सरकारविरुद्ध आन्दोलन गर्ने तयारी गरेका छन । होटल व्यवसायी महासंघले १४ बुँदे माग राख्दै तत्काल सम्बोधन नगरे आन्दोलन गर्ने चेतावनी दिएको हो । कोरोनाले होटल बन्द भएको र सरकारले साना होटलहरुलाई बेवास्ता गरेको उनीहरुको आरोप छ ।

यही अवस्था कायमै रहेको भन्दै होटल व्यवसायीहरुको छाता संगठन महासंघले विभिन्न १४ वटा माग राख्दै आन्दोलन गर्ने चेतावनी दिएको हो । बिहीबार काठमाडौंमा पत्रकार सम्मेलन गरेर महासंघका अध्यक्ष हिराध्वज शाहले माग सम्बोधन नभए आन्दोलन गर्न बाध्य हुने चेतावनी दिए ।

अध्यक्ष शाहले विदेशबाट आउने नागरिकको इच्छा अनुसार सस्तो दरका होटलमा क्वारेन्टाइन बस्न पाउने गरी व्यवस्थापनगर्न माग गरे । व्यवसायीहरुले तीन वटै तहका सरकारले पर्यटन व्यवसायसँग सम्बन्धित राजस्व सम्बन्धी नीति नियम तर्जुमा गर्दा महासंघ मातहतका निकायहरुको प्रतिनिधित्व गराउन समेत माग गरेका छन् ।

होटल व्यवसायीहरुले घरभाडामा ५० प्रतिशत छुटको व्यवस्था गर्न र घरभाडा छुट दिने घरधनिको बैंक ऋणको ब्याजमा सहुलियत दिन समेत माग गरेका छन् । महासंघले होटल व्यवसायीलाई प्राथमिकतामा राख्न, आवश्यक केही छुट दिन र भोलिका दिनमा पनि होटल व्यवसायीलाई सहुलियत दिन व्यवसायीको माग छ ।