आक्रामक स्वभावका इन्सपेक्टर लागुऔषध ब्युरोको ‘अनुसन्धान’ घेरामा

११ असार, काठमाडौँ । फूर्तिलो जीउ ज्यान भएका प्रहरी इन्सपेक्टर रुद्र शाही देश सेवाका क्रममा ६ महिनाअघि ललितपुर प्रहरी परिसर प्रवेश गरे । ज्यानमा तातो रगत भएका इन्सपेक्टरले देश र जनताको सेवा गर्ने कसम खाएका थिए ।

देश र जनताको सेवा गर्ने कसम खाएपनि उनको शरीरमा ‘एग्रेसन’ हावी भयो । जुन उनका लागि त सामान्य थियो । तर प्रहरी सेवाका लागि असामान्य बन्दै गयो । सेवाका क्रममा इन्सपेक्टर शाही महानगरीय प्रहरी प्रभाग सातदोबाटो पुगे । अरुभन्दा केही फरक रवाफ देखाउन बानी परेका शाहीको आक्रामक स्वभावले अरुलाई पनि असहज पार्दै थियो । सोही कारण उनका बानी व्यहोरा प्रहरी कार्यालयमा नोटिस हुदै गए ।

नोटिस भएका उनका व्यहोरा घट्नुको साटो झन् बढ्दै गएपछि सातदोबाटो प्रभागबाट महानगरीय प्रहरी परिसर जावालाखेल झिकाइएको पाइएको छ । १४ दिनअघि मात्रै प्रभागबाट परिसर बोलाइएका शाही बुधबार लागुऔषध नियन्त्रण ब्युरोको ‘आइसोलेसन’मा पुगेका छन ।

‘पहिल्यैदेखि उनी केही एग्रेसिभ थिए । एक दुई पटक नसम्झाइएको होइन । तर नमानेपछि परिसर तानियो । परिसर तानेको एक महिना नपुग्दै लागूऔषध ब्युरोले सोधपुछका लागि बोलाएको हो’ एक प्रहरी अधिकृतले नेपालबहससँग भने ‘एउटा प्रहरी अर्को कार्यालयमा जानु नौलो होइन । तर उहाँको एग्रेसनले ब्युरोको आइसोलेसन अर्थात अनुसन्धानमै पु¥यायो ।’

ब्युरोले उनलाई लागूऔषध कारोबारमा सलंग्न रहेको आरोपमा अनुसन्धान अगाडी बढाएको छ । बुधबार र बिहीबार थप अनुसन्धान गरेपछि शुक्रबार उनको सलंग्नता रहे नरहेको पुष्टि हुने ब्युरोका एसपी प्रवीण धितालले बताए ।

‘हामी अनुसन्धानमै छौ । उहाँको सलंग्नता पनि देखिन्छ । तर एकिन छैन । बाँकी सोधपुछ गरिरहेका छौँ । एकदुई दिनमा सबै कुरा थाहा हुन्छ । अहिले यो भन्दा धेरै नबोलौ’ उनले भने । धितालका अनुसार लागूऔषध कारोबारमा उनको गतिविधि र सलंग्नता शंकास्पद छ । एकहप्तादेखि काठमाडौँको कोटेश्वर, पेप्सीकोला र जडीबुटी आसपासमा चलाइएको अप्रेसनले लागुऔषध कारोबारीको ‘नेक्सस’ उनीसम्म पुगेको देखिन्छ । तर पुष्टि हुन बाँकी छ ।

शाहीलाई ब्युरोले बोलाएको कुरा ललितपुर प्रहरी प्रमुख एसएसपी टेकप्रसाद राई पनि स्वीकार गर्छन । ब्युरोले सोधपुछका लागि बोलाएको र आरोपको बारेमा अनुसन्धान हुनु नौलो नभएको उनको भनाई छ ।