मृतक परिवारले न्याय नपाएको भन्दै टिपर आवागमनमा रोक

◊ धीरुभाइ

१२ असार, सप्तरी । सप्तरीको सप्तकोशी नगरपालिकाको फत्तेपुरमा मृतक परिवारलाई न्याय र सडक दुर्घटनामा संलग्न टिपरधनीलाई कारवाहीको माग गर्दै टिपर आवागमनमा रोक लगाइएको छ । गठित संघर्ष समितिले मृतक परिवारलाई न्याय दिलाउन टिपरधनीलाई कारवाहीको माग गर्दै टिपर आवागनमा रोक लगाएका हुन् ।

संघर्ष समितिले टिपरको ठक्करवाट मृत्यु भएका सप्तकोशी नगरपालिका १ फत्तेपुर निवासी ७८ वर्षिय सहरमान राईको परिवारले न्याय नपाएको र टिपरधनीलाई कारबाही नगरिएकोले शुक्रबार बिहानदेखि टिपर आवागमनमा रोक लगाएको स्थानीय दिनेश शर्माले जानकारी दिए ।

समितिले टिपर आतंक वन्द गर्न र पीडित परिवारलाई न्याय दिन माग गरेको छ । टिपरलाई जान नदिदा सप्तकोसी भएर उदयपुर प्रवेश गर्ने अधिकांश टिपर फत्तेपुरमै रोकिदा बिचल्ली भएको छ । टिपरधनीलाई कारबाही नगरिसम्म र पीडितले न्याय नपाएसम्म टिपर आवागमनमा रोक लगाउने सघर्ष समितिले जनाएको छ ।

पूर्व पश्चिम लोकराजमार्ग अन्तर्गत जिल्लाको अग्निसाईर कृष्णासवरण गाउँपालिका स्थित महुली पुलमा टिपरले ठक्कर दिदा राईको मृत्यु भएको थियो । गत असार २ गते विशेष कामले राजविराज जाँदै गरेका राईको मोटरसाइकललाई टिपरले ठक्कर दिएको थियो ।