विराटनगर जलमग्न, भारतको एकतर्फी बाँधले डुबायो

१५ असार, विराटनगर । भारतले एकतर्फी रुपमा बाँध बनाएपछि मोरङको विराटनगर जलमग्न भएको छ । विराटनगरे महानगरपालिकाको दक्षिणी क्षेत्र डुवान सोमबार बिहानैदेखि डुबानमा परेको हो ।

सामान्य वर्षाले पनि पानी निकास नहुने देखिएपछि विराटनगर– १८ बुधनगर क्षेत्र डुवानमा परेको स्थानीयले बताएका छन । डुबानले गर्दा आफ्नै पसल जान पनि स्थानीयहरु बाँसको पुल बनाउन बाध्य भएका छन ।

डुवानकै कारण सात वर्षीय बालकको ज्यान गएको छ । वर्षाका कारण जमेको पानी जाने निकास नहुँदा बिहीबार घर नजिकैको खेतमा डुबेर स्थानीय जयपाल मण्डलका ७ वर्षीय छोरा अंकुश मण्डलको मृत्यु भएको हो ।

‘भारतले आईसीपी र रेलेको लिक बिछ्याउँदा ठूलाठूला ड्याम बाध्यो । तर निकासका लागि नाला राखिदिएनन् । जसका कारण डुबान भएको स्थानीयको भनाई छ ।

विराटनगर १८ भारतसँग सीमा जोडिएको क्षेत्र हो । आफ्नो क्षेत्रमा बाढीको प्रभाव रोक्न भारतले रेलको लिकलाई नै ड्यामको रुपमा प्रयोग गरेको स्थानीयले बताएका छन् ।

डुवानका कारण खेतीयोग्य जमिन जलमग्न छ । रोपेको धान पनि नष्ट हुने अवस्थामा पुगेको स्थानीयले बताए । बाढीका कारण विराटनगर १८ का खोक्साहा, समादगी, लावाघाट, भेडीयारी र डाङग्रा टोल बढी डुवानमा परेका हुन् ।

विराटनगर मात्रै होइन, भारतसँग जोडिएका तराईका धेरै जिल्ला बर्षायाममा डुबानमा पर्ने गरेका छन ।