प्रधानमन्त्री ओली नै नेकपा फुटाउन अग्रसर

२१ असार, काठमाडौँ । प्रधानमन्त्री केपी शर्मा ओली नेकपा पार्टी फुटाउन अग्रसर भएका छन । नेकपाका शीर्ष नेताहरुबाट पटक पटक आक्रमण भएपछि ओली नेकपा फुटाएर नयाँ पार्टी गठनमा लागेको चेतावनी मन्त्रीहरुलाई दिएका छन ।

शनिबार राती बालुवाटारमा मन्त्रिहरुसँगको भेटमा प्रधानमन्त्री ओलीले मन्त्रिहरुसँग कित्ताकाट गर्न मात्रै भनेनन्, भोलिका दिनमा फेरि यसरी भेट नहुन पनि सक्ने भन्दै धम्कीपूर्ण भाषा प्रयोग गरेका छन । प्रधानमन्त्रीको योजना हेर्दा स्थायी कमिटी बैठकबाट ओलीको राजीनामा माग गर्ने निर्णय पारित गर्ने तयारी प्रचण्ड-माधव नेपाल पक्षको छ ।

जवाफमा ओलीले अध्यादेश ल्याएर पार्टी फुटाउने तयारी गरेका छन । उनले यो सार सुनाउन पार्टी संकटमा परेको, एकता जोगाउन मुश्किल भएको र यस्तो बेला सरकारलाई सहयोग गर्न मन्त्रीहरुलाई आग्रह गरेका थिए ।

नेकपा फुटाउदा अहिले विपक्षमा रहेका झलनाथ खनाल, माधव नेपाल र बामदेव गौतम लगायतका नेताहरु नयाँ पार्टी अर्थात एमालेमा आउने ओलीको विश्वास छ । आइतबार बिहान प्रचण्ड लचिलो नभएको अवस्थामा ओलीले आइतबार वा सोमबार अध्यादेश ल्याएर पार्टी फुटाउने तयारी गरेका छन । उनले दल फुटाउन ४० प्रतिशत पनि नचाहिने व्यवस्थासहितको अध्यादेश ल्याउने समेत चेतावनी दिएका छन ।

राष्ट्रपति र आफूविरुद्ध षडयन्त्र भएकाले नयाँ कदम चाल्न आफू बाध्य हुने पनि ओलीको चेतावनी छ ।