सातै प्रदेशमा उद्योग खोल्न सरकारको ढिलासुस्ती

२१ असार, काठमाडौं । सरकारले सबै प्रदेशमा ठूलो उद्योग खोल्ने निर्णय कार्यानन्वयनमा ढिलाई गरेको छ । सात वटै प्रदेशमा कम्तीमा एक एक वटा ठूला औद्योगिक क्षेत्र स्थापना गर्ने सरकारको ५ वर्ष अगाडिको निर्णय अहिलेसम्म पनि ठोस रुपमा कार्यान्वयन भएको छैन ।

प्रदेशमा अहिलेसम्म पनि जग्गा खोज्नै बाँकी छ । खोजेका ठाउँमा पनि विवादछ । खोजेका जग्गाको वातावरणीय प्रभाव मूल्यांकन ईआईए प्रतिवेदन तयार गर्न लागिएको छ । तर जति पनि ठाउँमा उद्योग खोलिदैछ, सरकारको काममा निकै ढिलासुस्ती छ ।

भूकम्प गएकै बर्ष उद्योग, वाणिज्य तथा आपूर्ति मन्त्रालयले सात वटै प्रदेशमा एक एक वटा ठूला औद्योगिक क्षेत्र स्थापना गर्ने निर्णय गरेको थियो ।

उक्त निर्णय अनुसार प्रदेश नम्बर १ मा झापाको दमक, २ मा सर्लाही, बागमती प्रदेशको हेटौंंडा र चितवनको शक्तिखोर, गण्डकी प्रदेशमा लेखनाथको पटनारी, प्रदेश नम्बर ५ मा बुटवलको मोतीपुर, कर्णाली प्रदेशको सुर्खेत र जुम्ला, सुदूरपश्चिम प्रदेशको कञ्चनपुरको दैंजीमा ठूला औद्योगिक क्षेत्र स्थापना गर्ने उल्लेख छ । तर, निर्णय भएको ५ वर्षसम्म पनि कार्यान्वयनमा आउन सकेको छैन् ।