विश्वभर काेराेनाबाट पाँच लाख ३३ हजार भन्दा बढीको मृत्यु

२१ असार, काठमाडौं । कोरोना भाइरसको महामारीका कारण विश्वभर एकै दिन दुई लाख १२ हजार भन्दा बढी व्यक्तिमा संक्रमण पुष्टि भएको छ । यो एकै दिन नयाँ संक्रमित थपिएको अहिलेसम्मकै धेरै हो ।

यसअघि जुन २८ मा एक लाख ९० हजार भन्दा धेरैमा संक्रमण पुष्टि भएको थियो । अमेरिका, ब्राजिल, भारतसहितका देशमा तीव्र गतिमा संक्रमित थपिइरहेका छन् ।

भारतमा शनिबार अहिलेसम्मकै धेरै २२ हजार भन्दा बढीमा संक्रमण पुष्टि भएको छ । यस्तै अमेरिकामा पनि शनिबार अहिलेसम्मकै धेरै ५३ हजार भन्दा बढीमा संक्रमण पुष्टि भएको छ । दक्षिण अमेरिकी देश ब्राजिलमा शनिबार थपिएका संक्रमितको संख्या ४८ हजार भन्दा बढी रहेको छ।

विश्वभर हालसम्म एक करोड १३ लाख ८७ हजार भन्दा बढीमा संक्रमणकाे पुष्टि भइसकेको छ । त्यसमध्ये पाँच लाख ३३ हजार भन्दा बढीको ज्यान गएको छ ।

यो समाचार तयार पार्दासम्म कोरोनाका कारण उपचारपछि ६४ लाख ४५ हजार भन्दा धेरै जना निको भएर घर फर्केका छन् । यस्तै ४४ लाख ८ हजार भन्दा धेरैको उपचार भइरहेको छ भने ५८ हजार ४ सय ८७ जनाको अवस्था गम्भिर रहेको छ ।

डब्लुएचओले विभिन्न देशहरुले संक्रमण बढिरहे पनि त्यसलाई बेवास्ता गर्दा समस्या थप विकराल बन्दै गएको भनि चिन्ता व्यक्त गरेको छ ।