बालुवाटारमा ओली प्रचण्डबीच वार्ता शुरु, विष्णु पौडेल सञ्चालक !

२२ असार, काठमाडौं । पछिल्लो एक हप्तादेखि उत्कर्षमा पुगेको नेपाल कम्युनिष्ट पार्टी नेकपाको आन्तरिक विवाद समाधान गर्न प्रधानमन्त्री केपी शर्मा ओली र नेकपाका अध्यक्ष प्रचण्डबीच छलफल शुरु भएको छ ।

बालुवाटारमा शुरु भएको छलफलमा महासचिव विष्णु पौडेल पनि सहभागी रहेका छन । उनले दुई नेताहरुबीचमा मध्यस्तता गर्नेछन । दुई शीर्ष नेताबीच पछिल्लो समय दोस्रो पुस्ताका नेताहरुले दिएको सुझाव र सल्लाहका विषयमा सहमति गर्ने प्रयास भएको छ ।

यसअघि आइतबार र शनिबार पनि दुई नेताहरुबीचमा लामो छलफल भएको थियो । तर सहमति जुट्न सकेन । अध्यक्ष ओली र प्रचण्डबीच सहमति जुटाउन नेकपाको स्थायी कमिटी बैठक दुई दिन पछि सारिएको छ ।

नेकपाका शीर्ष नेताहरुको विवाद मिलाउन चिनियाँ राजदुत यान्छीको सक्रियता बढेको छ । चिनिया राजदुतको सक्रियतासँगै नेकपाभित्रको विवाद मिल्ने अपेक्षा गरिएको छ ।