सहायक कर्मचारीलाई ५० लाखको गाडी खरिद गर्न गोरखापत्र संस्थान नै जमानी !

२२ असार, काठमाडौं । सत्ताको आडमा कतिसम्मको नाजायज काम गरिंदो रहेछ भन्ने उदाहरण सरकारी सञ्चारमाध्यमका रुपमा रहेको गोरखापत्र संस्थानको एउटा प्रकरणले खुलस्त पारेको छ ।

सहायक तहको कर्मचारीले निजी गाडी खरिद गर्न बैंक ग्यारेण्टीका रुपमा संस्थानकै दुरुपयोग गरेको पाइएको हो । तत्कालिन नेकपा माओवादी निकट कर्मचारी संगठनको अध्यक्षको हैसियतमा रहेका विष्णुप्रसाद खनालले संस्थानको चरम दुरुपयोग गर्दै निजी गाडी खरिद गरेको पाइएको छ । भ्रष्ट र दादागिरी शैलीमा प्रस्तुत हुने खनालले खरिद गरेको निजी गाडीको ग्यारेण्टी संस्थानलाई बनाइएको छ ।

२०७४ साल असोज २९ गते संस्थानका निमित्त निर्देशक सोमबहादुर घलेले पुतलीसडकस्थित राष्ट्रिय वाणिज्य बैंकलाई पठाएको पत्रमा निज खनाल र उनकी धर्मपत्नी यशोदा संस्थानको कर्मचारी रहेकाले माग गरेको ऋण प्रवाह गर्न आग्रह गर्दै अन्यथा भएमा संस्थान जमानी बस्ने उल्लेख गरिएको छ ।

सोही पत्रको आधारमा निज खनालले करिब ५० लाख पर्ने गाडी खरिद गरेका छन् । जबकी सहायकस्तरको कर्मचारीले पाउने अनुदान त्यति हुुने अवस्था छैन । सत्ताको धाकधम्की दिएर उनले अनुचित लाभ लिएको पाइएको छ । संस्थान सुधारका लागि हाल क्रियाशील व्यवस्थापनले विगतमा भएका गलत कामलाई दण्डित गर्ने नीति लिएको छ ।

यो प्रकरणमा कसबाट कमी कमजोरी भएको हो त्यसको छानविन गरिने र दोषीमाथि कारबाही गरिने संस्थान व्यवस्थापनले जनाएको छ ।