काठमाडौंमा आज पनि २८ जनालाई कोरोना संक्रमण

२३ असार, काठमाडौं । पछिल्लो समय दैनिक संक्रमित बढिरहेका बेला काठमाडौं उपत्यकामा मंगलबार कोरोनाका २८ संक्रमित फेला परेका छन ।

काठमाडौं जिल्लामा १४, ललितपुरमा १० र भक्तपुरमा ४ जनामा संक्रमण देखिएको स्वास्थ्य तथा जनसंख्या मन्त्रालयले जनाएको छ । यसअघि सोमबार काठमाडौंमा अहिलेसम्मकै धेरै ५४ जनामा कोरोना संक्रमण देखिएको थियो ।

दैनिक संक्रमण बढ्दै गएकामा काठमाडौँमा समुदायस्तरमा कोरोना फैलिने जोखिम छ ।

पक्राउ परिने डरले मास्क लगाउने बढे

यस्तै सरकारले मास्क नलगाए पक्राउ गर्ने भनेपछि काठमाडौं उपत्यकामा मास्क लगाउनेको संख्या बढेको छ । सोमबार गृह मन्त्रालयले मास्क नलगाउनेलाई पक्राउ गर्न प्रहरीलाई परिपत्र जारी गरेको थियो ।

पक्राउ परिने डरले उपत्यकामा आज मास्क लगाउनेको संख्या बढेको स्वास्थ्य तथा जनसंख्या मन्त्रालयले जनाएको छ ।