जाजरकोट बारेकोटमा पहिरोमा पुरिएका १२ जनाकै मृत्यु भएको आशंका !

जाजरकोट । बारेकोट गाउँपालिका ४ सार्कीबाडामा गएको पहिरोमा पुरिएका १२ जनाकै मृत्यु भएको आशंका गरिएको छ । गएराती आएको पहिरोमा पुरिएका दुई घरपरिवार र पाहुना लाग्न गएका सार्की समुदायका १२ जनाकै मृत्यु भएको गाउँपालिकाका निमित्त प्रमुख प्रशासकीय अधिकृत गोविन्द बहादुर सिंहले जानकारी दिए ।

उनका अनुसार अहिलेसम्म एक जनाको घटनास्थलमै शब देखिएको छ । बाँकी ११ जनाको खोजी चलिरहेको छ । तर उनीहरु जिवित भेटिने सम्भावना निकै कम रहेको सिंहको भनाई छ । वडाध्यक्ष डम्बर पुनले पहिरोमा पुरिएका १२ जनाकै मृत्यु भएको जानकारी सदरमुकाम खलंगामा गराएका छन ।

भारी बर्षाका कारण उद्धारमा समस्या छ भने प्रहरी अहिलेसम्म पनि घटनास्थल पुग्न सकेको छैन । स्थानीय प्रहरी घटनास्थल पुगेको भनिएपनि फोन सम्पर्क नहुँदा सही जानकारी नपाएको जाजरकोटका प्रमुख जिल्ला अधिकारी जनकराज पन्तले बताए ।

गएराती आएको बर्षाका कारण उनीहरुको मृत्यु भएको भन्दै गाउँपालिकाले विवरण संकलन गरेको छ ।

जाजरकोटका पत्रकार काली बहादुर नेपालीको सहयोगमा