अन्ततः ट्रम्पले पनि लगाए मास्क

काठमाडौं । शुरुदेखि नै मास्क लगाउन अस्वीकार गरेका अमेरिकी राष्ट्रपति डोनाल्ड ट्रम्पले अन्ततः चौतर्फी दबाबपछि मास्क लगाएका छन । कोरोना भाइरस महामारी सुरु भएपछि सार्वजनिक स्थानमा जाँदा पहिलोपटक वाशिङ्गटन बाहिर वाल्टर रीड सैन्य अस्पताल जाँदा ट्रम्पले मास्क लगाएका हुन् ।

जनस्वास्थ्य विज्ञहरुले कोरोना संक्रमणबाट जोगिन मास्क लगाउन अनिवार्य रहेको बताउँदै आए पनि ट्रम्पले त्यसको पालना गरेका थिएनन् । उनले आफ्नो प्रतिद्वन्द्वी डेमोक्रेटिक नेता जो विडेनले मुखौटो लगाएर हिँडेको भनेर मजाकसमेत उडाएका थिए ।

यसअघि ट्रम्पले सार्वजनिक रुपमा अरुले देख्ने गरी, विशेष गरी पत्रकारहरुले देख्ने गरी मास्क नलगाउने बताएका थिए । तर शनिबार उनी कालो मास्कमा देखिएका थिए । यसले कोरोना भाइरसबाट ट्रम्प अन्ततः गलेको देखिन्छ ।

चीनबाट फैलिएको कोरोनाबाट सबैभन्दा बढी प्रभावित देश अमेरिका हो । जहाँ झण्डै ३२ लाख संक्रमित छन भने १ लाख ३५ हजार जतिले ज्यानै गुमाएका छन ।