नेकपा फुट्ने सम्भावना टरेपनि स्थायी कमिटी बैठक अन्यौलमा

काठमाडौं । अध्यक्षद्धय प्रधानमन्त्री केपी शर्मा ओली र अर्का अध्यक्ष पुष्पकमल दाहाल प्रचण्डबीचको गुटबन्दीले नेकपाको स्थायी कमिटी बैठक अन्यौलमा परेको छ ।

प्रधानमन्त्री केपी शर्मा ओलीसँगको बैठक छाडेर अर्का अध्यक्ष प्रचण्ड गृहजिल्ला चितवन लागेपछि नेकपाको स्थायी कमिटी बैठक आउँदो एक हप्तापछि पनि बस्ने पक्का छैन ।

प्रचण्डले प्रधानमन्त्री वा पार्टी अध्यक्ष पद छाड्नुपर्ने भनिरहदा ओली कुनै पनि हालतमा पद छाड्न तयार छैनन् । दुबैको पदीय भागबण्डा नमिल्दा एकहप्तादेखिको वार्ता टुंगोमा पुग्न नसकेको हो । असार २६ गते बस्ने बैठक पनि बस्न नसकेर स्थगित भएको थियो ।

आगामी साउन २ गतेसम्म स्थगित भएको बैठक त्यतिबेला पनि बस्ने सम्भावना कम रहेको नेकपाका नेताहरुको भनाई छ । खासगरी ओलीले अब स्थायी कमिटी बैठक बस्नै चाहेका छैनन् भने प्रचण्ड र माधव नेपालको समूहले स्थायी कमिटीबाटै ओलीले राजीनामा दिन लगाउने तयारी छ ।

नेताहरुकै यही पदीय स्वार्थमा कुरा नमिल्दा त्यसको असर सोझै स्थायी कमिटी बैठकमा परेको हो । नेताहरुको आन्तरिक स्वार्थ नमिल्दा बैठक नै प्रभावित भएपछि नेकपाका दोस्रो तहका नेता चिन्तित छन । विवाद रहेपनि तत्कालका लागि नेकपा फुट्ने सम्भावना भने टरेको नेताहरुको भनाई छ ।