सलहले नेपालमा अब ठूलो नोक्सानी गर्दैन : विज्ञ

काठमाण्डौ । भारत हुँदै नेपाल भित्रिएको सलहको अर्को झुण्डले ठूलो नोक्सानी नगर्ने विज्ञहरुले दाबी गरेका छन । प्यूठान, अर्घाआँची लगायतका जिल्लामा पुगेको सलहले सोही जिल्लामा नोक्सानी गरेपनि अरु जिल्लामा ठूलो नोक्सानी नगर्ने विज्ञहरुको दाबी छ ।

कृषि तथा पशुपंक्षी विकास मन्त्रालय अन्तर्गतको प्लान्ट क्वारेन्टाइन तथा विषादी व्यवस्थापन केन्द्रका प्रमुख सहदेव हुमागाईंले झण्डै १० देखि १२ लाखको संख्यामा आएका सलहको झुण्डले अरु जिल्लामा ठूलो नोक्सानी नगर्ने दाबी गरे ।

यस्तै नेपाल कृषि अनुसन्धान परिषद नार्कका किट वैज्ञानिक सुदीपकुमार उपाध्यायले भारतबाट आएको सलह प्रतिकूल मौसममा आएकाले ठूलो नोक्सानी गर्ने सम्भावना कम रहेको बताए । उनले बर्षाका कारण सलह आफै मर्ने पनि दाबी गरे । यसअघि भित्रिएको सलह पनि बर्षाकै कारण मरेका थिए ।

अहिले हावाको गति पूवोत्तर दिशामा रहेकाले भारतबाट सलहको झुण्ड नेपाल प्रवेश गरेको हो ।