६ निजी प्रयोगशालालाई कोरोना परीक्षणको अनुमति

काठमाडौं । कोरोना परीक्षणको दायरा बढाउन सरकारले ६ वटा निजी प्रयोगशालालाई जाँच गर्ने अनुमति दिएको छ । स्वास्थ्य तथा जनसंख्या मन्त्रालयको नीति अनुरुप राष्ट्रिय जनस्वास्थ्य प्रयोगशाला टेकुले मापदण्ड पुगेका काठमाडौँका ४ र बुटवल र नेपालगञ्जका २ गरी ६ वटा निजी प्रयोगशालालाई कोरोना परीक्षणको अनुमति दिएको हो ।

सानेपाको स्टार अस्पताल, सिनामंगलको काठमाडौँ मेडिकल कलेज शिक्षण अस्पताल, नयाँ बानेश्वरको सेन्ट्रल डाईग्नोस्टिक ल्याव सीडीएल र लाजिम्पाटमा रहेको सूर्या हेल्थ केयरले अनुमति पाएका छन । यी सबै काठमाडौं उपत्यकाका हुन ।

उपत्यकाबाहिर भने बुटवलमा रहेको नेशनल प्याथ ल्याव र नेपालगञ्जमा रहेको बागेश्वरी प्रयोगशालाले परीक्षण गर्ने अनुमति पाएका छन् ।

कोरोना परीक्षण गर्न अहिले देशभर २५ वटा प्रयोगशाला सञ्चालनमा छन् । अब निजीलाई पनि परीक्षण गर्न लगाएर कोरोना परीक्षणको दायरा बढाउने सरकारको उद्धेश्य छ । नेपालमा अहिलेसम्म साढे १६ हजार जनामा कोरोना पुष्टि भएको छ ।

तर पछिल्लो समय संक्रमितको संख्या घट्दै जान थालेपछि परीक्षणको दायरा थप बढाउने सरकारको तयारी हो ।