अयोध्या होइन, कालापानी र लिम्पियाधुरामा ध्यान देउ : कांग्रेस

काठमाडौं । प्रमुख प्रतिपक्षी दल नेपाली कांग्रेसले नेपाली भूमि फिर्ता ल्याउनुपर्ने बेला मनलाग्दी नबोल्न प्रधानमन्त्री केपी शर्मा ओलीलाई चेतावनी दिएको छ । लिम्पियाधुरासहितको नक्सा जारी गरेर नयाँ जिम्मेवारी र चुनौति आएका बेला भारतका विषयमा जथाभावी टिप्पणी नगर्न कांग्रेसले प्रधानमन्त्री ओलीलाई सुझाएको हो ।

‘अयोध्यातिर ध्यान नमोडौं, संसदबाट पारित नक्सामा हक कायम गर्न गम्भीर कूटनीतिक पहल थालौं’ कांग्रेस प्रवक्ता विश्वप्रकाश शर्माले प्रधानमन्त्री ओलीलाई भनेका छन । प्रधानमन्त्री ओलीले हिजो मात्रै भगवान राम नेपाली भएको र नेपालकै अयोध्यामा जन्मेको बताएका थिए । यसअघि ओलीले भारतले आफूलाई प्रधानमन्त्री पदबाट हटाउन खोजेको बताएका थिए । ओलीका दुबै अभिव्यक्ति विवादमा छन ।

यस्तो संवेदनशिल समयमा भारतसँग वार्ता गरेर भूमि फिर्ता ल्याउनुपर्ने बेला प्रधानमन्त्री ओलीले जथाभावी अभिव्यक्ति दिएको कांग्रेसको आरोप छ ।