संक्रमित मृतकका श्रीमतिसहित परिवारका पाँच जनामा संक्रमण

◊ धीरुभाइ

४ साउन, सप्तरी । कोरोना भाइरस (कोभिड १९) संक्रमणबाट मृत्यु भएका राजविराज निवासीको परिवारका पाँच जनामा कोरोना संक्रमण पुष्टि भएको छ । यी पाँच जनासहित जिल्लामा आइतबार थप ३२ जनामा कोराना संक्रमण पुष्टि भएको छ । यससँगै जिल्लामा संक्रमितको कूल संख्या ३७६ पुगेको छ ।

यता राजविराजका ६ निवासी प्रतिष्ठित व्यवसायी एवं समाजसेवी ७३ वर्षीय रामकृष्ण दासको (नाम नछाप्नु) गत बिहीबार मृत्यु भएको थियो । उनको सिधा सम्पर्कमा आएको श्रीमति, छोरा, बुहारी, नाती नातिनीसहित परिवारका पाँच जना सदस्यमा कोरोना रिपोर्ट पोजेटिभ आएको स्वास्थ्य कार्यालय सप्तरीका निमित प्रमुख दुनियालाल यादवले बताए । ६७, ३६ र ११ वर्षकी तीन महिला र १७ र ४५ वर्षको दुई पुरुष गरी पाँच जना पारिवारिक सदस्यमा कोरोना पुष्टि भएको उनले बताए ।

उनले भने मृतक परिवारका पाँच र घरको एक कामदार गरी छ जनाको रिपोर्टमा कामदार बाहेक परिवारका सबै सदस्यहरुमा कोरोना पाइएको छ । मृतक दासको सिधा सम्पर्कमा आएका परिवारका सदस्य, छ जना स्टाफसहित २९ जनाको कोरोना परीक्षणको लागि स्वाव संकलन गरिएको थियो । छ जनाको रिपोर्ट आएको छ । बाँकीको रिपोर्ट आउन बाँकी छ ।

१३ दिन अघि भारत दिल्ली र बिहारको दरभंगाबाट आफुसहित श्रीमतिको उपचार गराएर घर फर्किएका मधुमेह, मुटु र प्रोस्टेटका विरामी दासको बिहीबार धरानस्थित वीपी कोइराला स्वास्थ्य विज्ञान प्रतिष्ठान घोपामा उपचारको क्रममा मृत्यु भएको थियो । मृत्युपछि उनको घरमा सिधा आवतजावत र सम्पर्कमा रोक लगाएको छ ।

परिवारका सदस्यमा संक्रमण भेटिएपछि राजविराज स्थित कोशी ग्यासको प्रमुख डिलर र खाद बीज भण्डारका सञ्चालक रहेको दासको पसलमा आउने ग्राहक-उपभोक्तासम्म कोरोना संक्रमण फैलिएको हुन सकिने आशंका बढेको छ ।

जिल्लाको उद्योग व्यवसायी, जातीय संगठनका प्रमुख व्यक्तित्वहरु समेत सिधा सम्पर्कमा आएको हुन सकिने अनुमान गरिएको छ । परिवारका सबै सदस्यमा कोरोना पाइएपछि दासको यात्राबृतान्त, कन्ट्याक्ट ट्रेसिङ्ग कार्य सक्रियतासाथ अगाडी बढाइने स्वास्थ्यका निमित प्रमुख यादवले बताए ।