अत्यावश्यक बाहेक बर्षामा राजमार्गको यात्रा नगरौ : सडक विभाग

५ साउन, काठमाडौं । केही दिन भारी बर्षाको सम्भावना रहेकाले राजमार्गको बाटो भएर यात्रा नगर्न सडक विभागले आग्रह गरेको छ । जताततै पहिरो खस्ने र नदीले कटान गर्ने क्रम बढेकाले जोखिम झन बढेको र मानवीय क्षति हुने भएकाले अहिले राजमार्ग भएर यात्रा नगर्न सडक विभागले आग्रह गरेको हो ।

सडकहरुमा पहिरो जाने, भासिने र नदीले कटान गर्ने समस्या देखिएकोले यात्रा गर्दा सावधानी अपनाउनुपर्ने विभागका महानिर्देशक केशवकुमार शर्माले बताए । पहिरोका कारण अवरोध भएका ठाउँमा सडक खोल्ने काम भइरहेको पनि उनले बताए ।

देशभर झण्डै २ सय मेसिन परिचालन गरेर सडक खुलाउने प्रयास भइरहेको विभागले जनाएको छ । सडकमा खसेका पहिरो हटाउने र बाढीले क्षति पुर्‍याएका सडक मर्मतको काम गरिररहेको छ । तर, लगातार भइरहेको बर्षाले गर्दा तत्कालै सडक खुलाउने काम हुन नसकेको महानिर्देशक शर्माको भनाई छ ।