राजविराज अस्पतालको इमरजेन्सी वार्ड शिल !

◊ धीरुभाइ

९ साउन, सप्तरी । राजविराज स्थित गजेन्द्रनारायण सिंह अस्पतालको इमरजेन्सी वार्ड र नगरपालिकाको वार्ड नम्बर ६ सिरहारोड शुक्रबार शिल गरिएको छ ।

अस्पतालको इमरजेन्सीमा भर्ना भएको तिलाठी कोइलाडी २ का ५० वर्षीय एक विरामीमा कोरोना भेटिएपछि आज राती १२ बजेसम्मको लागि शिल गरिएको अस्पतालका मेडिकल सुपरिटेन्डेन्ट डा. रणजीतकुमार झाले बताए ।

तीन दिन अघि भर्ना भएका विरामीको उपचारमा खटिएका चिकित्सक, स्वास्थ्यकर्मीसहित १३ जना कर्मचारीलाई क्वारेन्टाइनमा राखिएको छ भने पोजेटिभ भेटिएको विरामीलाई आइसोलेसनमा भर्ना गरिएको उनले बताए ।

त्यस्तै राजविराज नगरपालिका वार्ड नम्बर ६ सिरहारोडमा संक्रमितको संख्या बढ्दै जाँदा सो वार्डको उक्त खण्डलाई निषेध गरिएको स्वास्थ्य कार्यालय सप्तरीका निमित प्रमुख दुनियालाल यादवले बताए ।

सिरहारोडबाट आवतजावत पूर्ण रुपमा बन्द गरिएको उनले भने, भोली शनिबार वार्ड नम्बर ६ का प्रत्येक घरका एक÷एक जनाको स्वाब संकलन गरी कोरोना परीक्षण गरिने निर्णय भएको छ ।