म्यान्चेष्टर युनाईटेड र चेल्सी च्याम्पियन्स लिगमा

१२ साउन, एजेन्सी । म्यान्चेष्टर युनाईटेड र चेल्सी च्याम्पियन्स लिग फुटबलमा छनौट हुन सफल भएका छन् । आईतबार राति लिग चरणको अन्तिम खेलमा जित निकाल्दै चेल्सी र युनाईटेड अर्को सिजन च्याम्पियन्स लिगका लागि छनोट भएका हुन् ।

लण्डन क्लब चेल्सीले उल्भ्स तथा म्यान्चेष्टर युनाईटेडले लेस्टर सिटीमाथि समान दुई शुन्य गोल अन्तरको जित निकाल्दै यस सिजन शीर्ष चारमा पर्न सफल भएका हुन् ।

चेल्सीलाई जिताउन मासन माउन्ट र ओलिभर जिरउडले गोल गरे । यस्तै म्यान्चेष्टर युनाईटेडका लागि ब्रुनो फर्नान्डेस र जेसे लिंगार्डले निर्णायक गोल गरे ।

यसअघि लगातार सिजनभरी तेस्रो स्थानमा रहेको लेस्टर भने अन्तिम समयमा युरोपा लिगमा सिमित भएको छ । गएको बर्ष च्याम्पियन्स लिग खेलेको यो क्लब यसपटक भने अन्तिम खेलबाट बाहिरिन पुग्यो ।

अन्तिम खेलमा हार व्यहोरेपनि जेम्मी भर्डी लेस्टरका नायक बन्दै यस सिजनको गोल्डेन बुट जित्न सफल भएका छन् ।