नेकपाको स्थायी कमिटी बैठक बस्नेमा आज पनि अन्यौल !

१३ साउन, काठमाडौं । सत्तारुढ नेकपाको स्थायी कमिटी बैठक बस्नेमा आज पनि अन्यौल छ । हिजो दिनभर प्रचण्ड र ओली निकट नेताहरुको आन्तरिक छलफल भएपनि दुई अध्यक्षबीच सहमति हुन सकेको छैन् ।

ओली र प्रचण्डबीचमा सहमति नहुँदा आजका लागि तय गरिएको स्थायी कमिटी बैठक बस्ने वा नबस्ने एकिन हुन सकेको छैन् । बैठक बस्नुअघि ओली र प्रचण्डबीच बैठक तथा छलफल हुने गरेकामा हिजो र आज दुई नेताबीच भेटवार्ता भएको छैन् । दुई अध्यक्षबीचमा सहमति हुनुको साटो आ आफ्नो रणनीति तय गरेर बसेका छन् ।

हिजो प्रचण्डले आफ्नै निवास खुमलटारमा वरिष्ठ नेता माधव कुमार नेपाल, झलनाथ खनाल लगायतका नेताहरुसँग आन्तरिक छलफल गरेका थिए । पूर्व माओवादी र पूर्व एमालेको असन्तुष्ट गुटसँग सहकार्य गरेका प्रचण्ड आजको बैठकमा बहुमतको प्रक्रियाबाट निर्णय गर्ने पक्षमा छन् ।

सोही जानकारी पाएका ओली भने आजको बैठक जसरी हुन्छ, सार्ने पक्षमा छन् । तर ओलीको सो प्रस्ताव प्रचण्ड र माधव नेपालले मानेका छैनन् । गएको हप्ता साउन ६ गते स्थायी कमिटी बैठक बसेर आजसम्मका लागि स्थगित भएको थियो ।

त्यसबेला बाढी र पहिरोका कारण बैठक स्थगित गरिएको भनिएपनि दुई अध्यक्षबीच कुरा मिल्न नसक्दा बैठक सारिएको थियो । तर यो एक हप्तामा पनि ओली र प्रचण्डबीच कुरा मिलेको छैन् । यसबीचमा साउन ९ गते ओली र प्रचण्डबीच छलफल भएपनि सहमति हुन सकेको थिएन् ।

त्यसयता अध्यक्षद्धय ओली र प्रचण्डबीच न भेटवार्ता भएको छ, न त सहमतिका लागि कुनै आन्तरिक एजेन्डामा छलफल नै भएको छ । यस्तो अवस्थामा ओली र प्रचण्डबीचको टकराव झन बढ्ने र नेकपा दुर्घटनातर्फ जान सक्ने जोखिम बढेको छ ।