संक्रमितबाट संक्रमण फैलियो : जरो भेट्न सकेन, अझै थप्ने आशंका !

◊ धीरुभाइ

१४ साउन सप्तरी । सप्तरीमा गत ९ गते एक जना विरामी पुरुषमा कोरोना भाइरस संक्रमण भेटिएको थियो । राजविराज स्थित गजेन्द्र नारायण सिंह अस्पतालमा कोरोना पुष्टि हुनु भन्दा तीन दिन अघि विष खाएर जिल्लाको तिलाठी कोइलाडी गाउँपालिका २ लौनियाँ निवासी ५० वर्षीय उनी भर्ना भएका थिए ।

संक्रमति विरामी कन्ट्याक्ट ट्रेसिङ र ट्रेकिङ्ग अन्तर्गत उनको परिवारका सदस्यहरुलाई राखेर भोली पल्ट स्वाब संकलन गरियो । सो दिन स्वाब संकलन गरिएकामध्ये १०८ जनाको रिपोर्ट सोमबार (१२ गते) साँझ अबेरमा आएको स्वास्थ्य कार्यालय सप्तरीका शर्मिला चौधरीले बताइन । तीमध्ये १५ जनाको रिपोर्टमा कोरोना संक्रमण भेटिएको थियो ।

सो दिनको रिपोर्टमा संक्रमित विरामी पुरुष परिवारका पाँच जना र सम्पर्कमा आएका गाउँका एक जना पुरुषमा कोरोना संक्रमण भेटिएको स्वास्थ्य कार्यालय सप्तरीका निमित्त प्रमुख दुनियालाल यादवले बताए ।

उनको परिवारका ५१, ४०, २९, २७ र २२, बर्षीय पुरुषमा संक्रमण भेटिएको उनले उनको सम्पर्कमा आएका वडा नम्बर ६ का २२ बर्षीय पुरुषमा पनि कोरोना संक्रमण भएको बताए ।

तर, विरामी पुरुष कहाँबाट कसरी संक्रमित भयो त्यो कुरा पत्ता नलागेको स्वास्थ्य कार्यालयका निमित प्रमुख यादवले भने, उनको गाउँमै कोही संक्रमितबाट सरेको हुन सक्छ । संक्रमणको जरो पत्ता नलाग्दा जोखिम बढेको छ ।