विरगञ्जका मेयरलाई कोरोना संक्रमण पुष्टि

१५ साउन, काठमाडौं । विरगञ्ज महानगरपालिकाका मेयर विजय सरावगीलाई कोरोना भाइरसको संक्रमण पुष्टि भएको छ । पछिल्लो समय विरगञ्जमा समुदायस्तरमै कोरोना फैलिसकेकाले आफूले पनि परीक्षण गर्दा कोरोना पुष्टि भएको मेयर स्वंयमले बताएका छन् ।

सामाजिक सञ्जाल फेसबुकमा स्टाट्स पोष्ट गर्दै मेयर सरावगीले आफू नागरिकको उद्धार र व्यवस्थापनमा लाग्दै गर्दा कोरोनाबाट संक्रमित भएको बताएका छन ।

‘वीरगञ्जलाई ग्रीन जोन बनाउन एक घर एक परिक्षणको अभियान संचालन गरेपनि कोरोना संक्रमण समुदाय स्तरमा फैलिसकेको रहेछ’ फेसबुकमा उनले लेखेका छन, ‘तपाईहरुको सेवामा अनवरत रुपमा लाग्दा लाग्दै म स्वंयम कोरोना संक्रमणको चपेटामा परेको छु ।’ मेयर सरावगीले संक्रमणपछि आफू आइसोलेसनमा बसेको र चाँडै कोरोना जितेर घर फर्किने बताएका छन् ।